TN inthlan turah party-ten thil sem tur intiamsiak

Tamil Nadu assembly inthlan neih tur atan party hrang hrangte an campaign ngawrh tawh hle a, mipuite vote hmuh tumin a thlawna thil sem tur an intiamsiak mek.

Rorellai AIADMK hotu, Chief Minister J Jayalalithaa-i chuan an party-in sorkarna a chang leh a nih chuan a thlawna mobile phone sem a tiam bakah, hmeichhia scooter leite tan 50% a tihtlawm sak a ni dawn tih a sawi.

AIADMK hotu chuan ration card nei zawng zang hnenah coupon, Rs 500 hu pek vek an ni dawn tih a sawi a, school zirlai-te tan a thlawnin laptop sem chhun-zawm zel a nih bakah, farm loan ba neite pawh ngaihdam a ni ang, a ti.

Jayalalithaa-ichuan an sorkar leh a nih chuan in tinah power 100 unit an hman chu a thlawna pek an ni dawn tih a sawi a, hei hian chhungkhaw nuai 78 vel zet a huam tel ang. Sorkar hnuaia cable television service pawttu tan a thlawnin set-top box pek a tiam bawk. AIADMK in a tiam hrang hrang zingah hian mi rethei tana Amma Banking Card pek te, chhungkaw rethei zual hnena a thlawna kel hnute pek chhunzawm zel te, mipuiten man tlawm zawka thil an lei theihna tur Amma Canteen siam chhunzawm zel te, mi rethei naupai ṭanpuina Rs 18,000-a tihpunte, primary school zirlaite tana a thlawna breakfast pek te,mi rethei chhungkua pasal nei turte tana rangkachak gram riat pekte a tel.

DMK pawhin mipuite hip tumin thil tam tak a tiam bawk. DMK in sorkarna a siam chuan state chhunga mi retheite hnenah a thlawna smartphone pek a tiam a, hemi rual hian a thlawnin 3G/4G service leh laptop leh tablet sem a tiam bawk. State chhunga zirlai nuai 16 vel zet tan thla khatah man chawi loin 10 GB chin thil an downloadn phalsak an ni bawk ang.

DMK hian thla tina mi rethei chhungkaw tana buhfai kg 20 zel pekna tur scheme siam a tiam bawk. Hei bakah hian farm leh educational loan ba-te ngaihdam tiamin, Aavin bawnghnute hman chu litre khat Rs 7-a tihhniam a tiam.

BJP pawhin an state-a infiamna lar tak, tunhnaia khap ni ta, Jallitkattu chu kum tharah phalsak leh a tiam a, BPL chhungkuaa ami, pasal nei turte tan rangkachak gram riat a thlawna pek zel a tiam bawk.

Desiya Murpokku Dravida Kazhagam (DMDK) chuan Pongal festival chu kar khat chhung hman a tiam a, hemi chhung hian zirna in zawng zawng pawh chawlh pek vek an ni ang,a ti. DMDK chuan petrol man chu litre khat Rs 45 leh diesel litre khat Rs 35-a bithliah a tiam bawk a, loneitu 5,000 chin tal chu kumtinin lo neih dan chungchang zirchiang tura rampawn lama tirhchhuah a tiam.