Telangana-ah missionary sikul beih a ni

Telangana Mancherial district-a Kannepalli khuaa missionary sikul, Blessed Mother Teresa high school chu mipui lungawi loin luh chilhin an bei a, zirtirtu leh staff dangte kut an thlak. Sikul beihnaah hian thi leh hliam an awm erawh hriat a ni lo.

Blessed Mother Teresa high school hi Hyderabad aṭanga km 250-a hlaa awm a ni a, beih a nih chhan hi zirlai naupang ṭhenkhat thawmhnaw hak chu principal-in sakhaw kaihhnawih thila hak phal lo anga report a awm vang a ni. Principal bakah hian zirtirtu ṭhenkhat chuan heng zirlaite hi class-a luh an phalsak lo niin an sawi bawk. Zirlai nu leh pate'n complaint theh lutin, police-te hian sikul-a thawk staff pahnih leh principal lakah hian sakhaw behchhana sakhaw zuitu dang rilru tinaa inhuatna tuh thubuai an ziak lut a ni.

Hetih lai hian sikul thuneitute chuan an principal Jaimon Joseph hian tun kar tir khan zirlai ṭhenkhat chu sikula saffron rawng thawmhnaw an hak chungchang zawt fiahin, zirlaite hian ni 21 awh, Hanuman Deeksha an hman mek vang a nih thu an hrilh hnuah principal hian sawiho turin zirlaite hi sikula an nu leh pate hruai turin a hriattir niin an sawi. Hemi hnu hian mi tu tih hriat lohin social media lamah Blessed Mother Teresa high school principal-in an sikula Hindu sakhaw kaihhnawih thawmhnaw hak phal lo anga sawiin a theh darh a, hei vang hian mipui thinrimin sikul hi an bei ta a ni. Sikul thuneitute hian police hnenah complaint theh lut mah se, tu mah man an la ni lo.

Telangana-a missionary sikul beihna video darh ṭhenkhatah chuan saffron rawng thawmhnaw ha patling eng emaw zat Jai Shri Ram tia an au rual lai hmuh tur a awm a, sikul darthlalang an tichhe laite bakah sikul zirtirtute'n an pawikhawihna titawp tura hlau leh mangang taka an ngen laite pawh hmuh tur a awm bawk. Mipui thinrim pung khawm zinga ṭhenkhat hian sikul principal Joseph chu hual betin kut an thlak bawk a, a chalah hnawih sen an hnawih lui a ni. Sikul beitute hian sikul thuneitute aṭanga ngaihdam dilna an phut thu an sawi bawk.