Karnataka-a ṭhalai hna nei lote tan Congress a thawk ang : Rahul Gandhi

Karnataka Mandya hmuna mipui hmaa thu a sawinaah, Congress party hruaitu Rahul Gandhi chuan Lok Sabha inthlan zawha sorkarna an siam a nih chuan Karnataka ṭhalai hna nei lote pui tura hna an thawh tur thu a sawi.

Rahul Gandhi hian Mandya-a thu a sawinaah hian Pehli Naukri Pakki scheme chu tihhlawhtlin ngei a nih tur thu a sawi a,"Helaiah hian Karnataka ṭhalaite tan Congress chuan thil la thleng ngai reng reng lo a tihsak dawn che u a ni tih sawi turin ka lo kal a ni. He hmalakna hi Pehli Naukar Pakki a ni a, a awmzia chu ṭhalai hna nei lote hi Congress hian an hnathawh tur hmasa ber kan hmuhsak dawn. College chhuak emaw, diploma nei i ni emaw, Congress hian hna nei tura chanvo i neih hi a pe dawn che a ni," a ti. Rahul Gandhi hian India rama a vawi khat nan Congress chuan loneitute tan dan ang thlapa Minimum Support Price (MSP) man bithliah pek a nih theih nan hma an lak tur thu a sawi bawk.

Karnataka assembly election neiha Congress-in an thutiam an tihhlawhtlin tawh dante tarlangin, Rahul Gandhi chuan,"Vawiinah chuan state chhunga hmeichhia vaibelchhe khatin thla tin Rs. 2,000 an dawng tawh a, Griha Jyoti Yojana kaltlangin chhungkaw vaibelchhe khat chuangin a thlawnin eng an dawng a, Anna Bhagya scheme hnuaiah buhfai kg 10 a thlawna dawngin, Yuva Nidhi scheme hnuaiah ṭhalai nuai khat chuangin Rs. 3,000 thla tin an dawng bawk. Kan nu leh farnute chu Karnataka-ah a thlawnin bus an chuang tawh bawk a ni," tiin a sawi. Karnataka-ah hian Lok Sabha inthlan hi thawh hniha neih a ni dawn a, April 26 leh May 7-ah te vote thlak a ni ang.