Sorkar laipuiin green credit programme inkaihhruaina tidanglam

Pawl leh mimalin ramngaw siam ṭha leh tura nasa zawka thing phun a, thing an phun mana green credit certificate an dawn, green credit platform-a hralh leh theiha sorkar laipuiin a buatsaih, Green Credit Progamme (GCP) inkaihhruaina duan tawhte chu a tidanglam.

GCP hi union environment ministry kutken niin, thingphun tam chu pawisa dawn nan chauha hlawkna atana hman an hlauh thu leh, hei hi GCP thil tum a nih loh thu an sawi. Ecosystem siam ṭhat chu thing phun aia dah pawimawh leh ngaihtuah ṭul thil a nih thu an sawi a ni. State 13-a forest department-te chuan GCP hnuaia ramngaw siam ṭhat leh tur atan hian ram hectare 10,983 tiat zet an pe tawh a, pawl leh mimalin thing phuna ramngaw siam ṭhat lehna tur project atan hian Indian Council of Forestry Research and Education (ICFRE)-ah an dil thei a ni. Heng project-a thing phunte hi kum hnih hnuah en dik leh tur a ni a, thing tin hian credit neiin, heng credit-te hi green credit platform-ah pawisaa thleng theih a ni dawn a ni.

Environment ministry hian thuchhuah an siam hnuhnung berah thing phun hmanga ram chhe tawh siam ṭha leh tura senso ngai zat tur chhut chu state sorkar buaipui turin a dah a, ram hectare khat zelah thing 1,100 aia tlem lo a awm tur a ni tiin a tarlang bawk. Heng ruahmanna siam tawh sa hi ministry hian ram chhe tawh siam ṭhat leh turte dinhmun a inan loh theih avangin a tidanglam a ni.