Lok Sabha inthlan 2024 thawh khatna neih a ni

India ram hruaitu tur thlanna, Lok Sabha inthlan, 2024 thawh khatna chu nimin khan state 17 leh Union Territory (UT) 4-ah neih a ni a, rorel lai, BJP chuan term thumna atana sorkar siam an tum laiin; Congress leh a thawhpui party-te INDIA chuan BJP sorkar paihthlak tumin he inthlan hi an hmachhawn ve bawk a ni.

Kumin Lok Sabha inthlan hi thawh sariha neih tura ruahman a nih thu Election Commission of India (ECI) chuan a puang tawh a; nimina inthlan thawh khatna neihah hian state leh UT 21-a constituency 102-ah vote thlak niin, candidate 1,625 an awm a, heng zinga 1,491 hi mipa leh 134 hi hmeichhia an ni. Inthlan thawh khatnaah hian UT pali (Jammu & Kashmir tiam loin) bakah, Uttarakhand, Tamil Nadu, Mizoram, Arunachal Pradesh, Nagaland, Meghalaya leh Sikkim-ahte chuan constituency zawng zawngah vote thlak zawh vek a ni. Thawh khatnaa state tel zingah; Uttar Pradesh, Rajasthan, Madhya Pradesh, Maharashtra, Chhattisgarh, Bihar, West Bengal, Tripura, Assam leh Manipur-ah te chuan constituency ṭhenkhatah chuan vote thlak niin, inthlan thawh hnihna aṭanga thawh sarihna neih chhungin vote thlak chhunzawm tur a ni ang.

ECI chuan inthlan thawh khatnain a huam chhungah hian voter vbc. 16 an awm niin an tarlang a, vote thlak nan hian polling station nuai 1.87 buatsaih niin, nimin inthlan bik atan hian helicopter 41, special train 84 bakah lirthei nuai khat chuang hman a ni a, inthlan buaipui tur hian mi nuai 18 chuang tirh chhuah an ni bawk. Vote thlak theih hun hi zing dar 7-ah hawn niin, Manipur-a Imphal East constituency-ah chuan tlai dar li khan khar a ni a, constituency dangah tlai dar 5 leh dar 6-ahte khar a ni hlawm.

Nimin inthlana state vote thlak zingah tlai dar 3 thleng khan ram pum huapa vote tla zawng zawng hi 49.78% niin Election Commission chuan an tarlang a, Tripura chu vote tlak ṭhatna ber niin, vote tla hi 68% a tling. West Bengal chu vote tlak ṭhatna ber pahnihna niin, vote tla zawng zawng hi 66% a tling bawk. Bihar chu vote tlak tlemna ber a ni a, 39% a tla a ni.

Vote thlaknaah Manipur-a booth panga chu chawlh lailawk ngaiin buaina a chhuak a, Bishnupur constituency-ah polling booth silaia kah a nih avangin EVM a chhiat phah bawk. West Bengal-a Cooch Behar, Alipurduar leh Jalpaiguri constituency leh Chhattisgarh-a Bastar constituency-ah te buaina tenau a chhuak bawk a, police hliam tuar pakhat a awm.