West Bengal-a Ram Navami lawmnaa bomb puakah BJP leh TMC te an inpuh tawn

West Bengal-a Murshidabad district-ah April 17 khan Ram Navami lawmna hun hmannaah bomb tihpuah a ni a, bomb tipuaktuah hian West Bengal-a rorel lai, Trinamool Congress (TMC) leh eptu, Bharatiya Janata Party (BJP) te chu an inpuh tawn.

Murshidabad district-a Ram Navami lawmna hi Beldanga-a Shaktipur area-ah neih a ni a, mipui pun khawmna hmunah tualchher bomb tihpuah niin, he bomb puak avang hian police mi leh sa tiamin mi 17-in hliam an tuar a ni. Election Commission of India (ECI) pawhin district thuneitute hnen aṭangin bomb puak chungchang report kimchang hi a dil tawh a, Ningani tlai khan theh luh tawh a ni bawk.

West Bengal chief minister, Mamata Banerjee chuan pawikhawihna hi BJP thiltih niin a sawi a,"Engkim kha ruahman sa a ni. Murshidabad Deputy Inspector General of Police (DIG) kha Ram Navami lawm hma deuh khan sawn chhuah a ni a, hei hi BJP-in an ruahmanna a hlawhtlin theih nana an tih a ni," a ti. Mamata hian Murshidabad DIG sawn chhuah chungchangah hian an lungawi lohna a lo sawi chhuak tawh a, Ram Navami laia buaina chhuak a awm a nih chuan Election Commission-in mawh an phur a ṭul tur thu a sawi a ni. West Bengal-a Ram Navami lawmna tam tak hi TMC hruaitu, Lok Sabha inthlana ding turte'n an hmanpui hlawm a ni.

Hetih lai hian BJP hruaitu, Suvendha Adhikari chuan Mamata Banerjee hi pawikhawihna thlengah hian mawhphurtu niin an sawi ve thung a,"State chhung hmun hrang hranga Ram Navami lawmnaah buaina a chhuak a, hei hi CM-in thu dengkhawng tak tak a chhah chhuah vang a ni. CM thusawi avang hian misualte chuan an laka action lak a ni dawn lo tih hre sain an chet ngam phah a ni," a ti. Adhikari hian Governor leh Election Commission chu Mamata thusawi dengkhawng tak tak chungchanga hma la tura a phut thu a sawi a, nikuma an tihdan ang bawk in National Investigation Agency (NIA) chhui zui tura court-a thlen a tum thu a sawi bawk.