CAA khinna chungchangah SC-in Assam leh sorkar laipui chhanna pe turin hriattir

Supreme Court chuan Citizenship Amendment Act (CAA) dan siam chungchang khinna thubuai a ngaihtuah lai mekah, sorkar laipui leh Assam sorkar chu chhanna pe turin a hriattir.

Chief Justice of India (CJI), DY Chandrachud leh Justice JB Pardiwala te ṭhut bench chuan CAA dan siam khinna chungchang hi an ngaihtuah a ni. Thubuai theh luttu hi Guwahati-a cheng, Hiren Gohain niin, SC hian Assam sorkar bakah, union ministry of home affairs leh external affairs te a hriattir a ni. Supreme Court bench hian he thubuaiah hian CAA chungchanga petition theh luh dang zawng zawng pawh dah luh tel vek turin thu a chhuah bawk. SC hian Citizenship Amendment Act, 2019 hman theih a nih leh nih loh chungchanga thutlukna a siam hma chu CAA dan siam hi stay rih tura ngenna chu a lo hnawl tawh a ni.

Gohain hian a thubuai theh luhah CAA dan siam chu constitution kalh a nih thu leh, thlei bik leh duhsak zawng neia siam a nih thu te, phal loh thil leh constitution basic structure a dodal thu te a tarlang a ni. "CAA rules, 2024 hman tak hian he thubuai theh luttuin dikna chanvo (fundamental rights) a neih; India danpuia article 14, article 15, article 19 leh article 21-te a palzut a ni," tiin, Gohain hian mimal anga CAA dan khinna hi theh lut ni mah se, Assam leilung fa tia chhiar tam zawkte aiawh pawh a nih tel thu a tarlang bawk. Gohain chuan Bangladesh aṭanga Assam-a dan loa lut an buaipui ṭhin chu an buaina bul ber ni loin, Bengali emaw, Hindu leh Muslim emaw an nih vang lama buai an nih loh thu leh, ram pawn lam aṭanga lo lut ru hrim hrim, Hindu leh Muslim te chuan Assam ram leilung fate chanvo an chhuhsak a nih zawk thu a sawi tel bawk.