Loneitute nawrhna avangin rel 54 cancel

Punjab, Patiala district-a Shambhu rel kawngah loneitu eng emaw zat chu lungawi loin an pung khawm a, hei vang hian Inrinni khan Ambala-Amritsar rel kawng zawh ṭhin rel 54 zet chu cancel a ni.

Shambhu rel kawnga loneitu nuarte hi ni li an nuar tawh a, hei hi loneitute nawrh huaihawtnaa Haryana police-te'n loneitu an man pathumte chhuah an phut vang a ni. Ni li zet an nawrh chhung hian rel 380-in harsatna an tawh phah tawh a, hei hian rel hmangtu passenger-te thlengin a nghawng a ni.

February 13 aṭang khan India rama loneitute chu loneitu pawl pahnih; Samyukta Kisan Morcha (Non-Political) leh Kisan Mazdoor Morcha (KMM) te bultumin, Delhi chalo hming vuahin an nuar ṭan a, hei hi sorkar laipui laka an thil phut hrang hrang tihhlawhtlin a nih theih nana an tih a ni. Loneitute hi sipaiin an dan avangin Delhi an thleng thei lo a, Shambhu leh Khanuari-ahte awmhmun khuarin an la awm a ni. Hetih lai mek hian police-in an zinga mi pathum an mante chhuah an nih theih nan Ambala-Amritsar rel kawng hi April 17 aṭang khan an dang ṭan a ni.