Delhi HC-in May 15-ah Kejriwal-a petition ngaihtuah dawn

Delhi chief minister, Arvind Kejriwal-a'n Enforcement Directorate (ED)-in an man hmaa an hmaa inlan tura an kohna chungchang court-a a khinna chu Delhi High Court chuan May 15-ah ngaihtuah a nih tur thu a puang.

Delhi High Court-a justice Suresh Kumar kaihhruai bench chuan thuchhuah hi siamin, ED-in Kejriwal an man chungchanga court zawhna chhannate an theh luh tawh thu leh, Aam Admi Party (AAP) chu ED chhanna pek chungchangah an sawi duhte theh luh nan kar khat hun pek an nih thu an puang bawk. Kejriwal-a aiawha ding, senior counsel chuan ED lehkha theh luh chhanna tur hi an theh luh ve tur thu sawiin, ED-in Kejriwal man tura hma an lak dan chu Prevention of Money Laundering Act (PMLA), 2002 dan kalh a nih thu a sawi.

Arvind Kejriwal hi ED hian Delhi excise policy thubuai kaihhnawiha pawisa chheprelh chungchangah an hmaa inlan turin vawi kua lai an hriattir a, heti chunga a la inlan loh avang hian March 21 khan man a ni ta a ni. Kejriwal hian man a nih dan chungchangah hian PMLA hnuaia dan ṭhenkhat chu constitution kalh a nih thu te, bail-a chhuah phal a nih loh chhan leh man a nih chhan takte chu petition-ah hian a zawt tel a ni.

AIIMS medical board-in Kejriwal hriselna dinhmun endik dawn

Central Bureau of Investigation (CBI) leh ED-te thubuai khawihtu, special judge, Kaveri Baweja chuan Tihar jail-a awm mek, Delhi chief minister Arvind Kejriwal-a sugar level endik a, insulin a mamawh leh mamawh loh bakah, a taksa hriselna dinhmun enfiah tur medical board din turin AIIMS a hriattir.

Kejriwal-a hriselna dinhmun chungchanga AAP-in Tihar jail thuneitute inthlahdah thu leh ED chu thudik lo sawia an puh hnuah, Delhi court hian AIIMS hnenah hian Kejriwal-a hriselna dinhmun endiktu tur board din tur hian a hriattir a, mahse, Kejriwal-a'n video conference hmanga doctor rawn a dilna erawh court hian a phalsak lo thung.

AAP hian Tihar jail-a awm mek, an party hruaitu hi inenkawlna atana a mamawh insulin pawh pek a nih loh thu sawiin, Kejriwal chu sugar avanga harsatna nei leh, kum eng emaw zat chhung ni tin insulin unit 50 pek ṭhin a nih thu an sawi. AAP hian jail-a dah a nih hnua Kejriwal-a sugar level chu jail thuneitute'n BJP an hlauh avangin a ṭha vek angin an tarlang ṭhin niin an puh. AAP hruaitu Atishi leh Arvind Kejriwal-a nupui, Sunita Kejriwal te chuan jail-a Arvind Kejriwal-a insulin pek phal a ni lo chu amah thah tumna a nih thu an lo sawi tawh bawk.

Hetih lai hian Tihar jail thuneitute chuan Kejriwal hi insulin dose sang vak lo an pek tawh thu an sawi. Thawhṭanni zan khan Kejriwal-a sugar level hi 217 velaa san thut avangin, Tihar doctor hian insulin hi a pe ta a ni tiin jail official-te chuan an tarlang.