Congress-in PM Modi laka action la turin EC an phût

Prime minister Narendra Modi-a'n Congress party manifesto chungchang a sawinaah, inhuatna tuh zawnga thu kailek leh dik lo taka an manifesto sawiah Congress chuan puhin, PM Modi-a laka action lak an phût thu Election Commission of India (ECI) hnenah an thlen.

PM Modi hian Rajasthan-a BJP election rally-a thu a sawinaah, Congress chuan Muslim hnenah mipuite'n ram leh rangkachak an neihte chhinchhiah a, sem darh ṭhat an tum thu a sawi. Hei hi Congress chuan thudik lo a nih thu sawiin, Congress manifesto khawi laiah mah chutiang an ziah lan loh thu an sawi a ni. Hemi chungchangah hian Congress president, Mallikarjun Kharge chuan PM Modi chu inhuatna tuh tum leh amah anga Prime Minister dinhmun hnukhniamtu an la awm ngai loh thu a sawi a, P. Chidambaram pawhin PM thusawi ang reng reng chu manifesto khawiah mah a lan loh thu a sawi ve bawk.

Congress hian PM Modi thusawi avang hian Election Commission hnenah action lak ngei an phut thu an thlen a, Prime Minister chuan sakhua leh sakhaw zuitute inkara inhuatna tuh a tum a ni tiin, a thusawi dan hmang chu Model Code of Conduct (MCC) bawhchhiatna a nih bawk thu an tarlang a ni. Hetih lai hian Election Commission erawh chuan Congress thu thlen chungchangah hian engmah an la sawi lo thung.

EC hnenah compliant an theh luhah hian Congress chuan BJP thil tih dan dik tawk lo16 an tarlang a, rorel lai party chungah hian action la ngei turin an phut. Complaint an theh luh zingah hian inthlanpui neih chhoh lai mekah Department of Higher Education, Ministry of Human Resources-in UGC member a ruat thar chunghcang pawh an sawi lang a ni. UGC website-a a lan danin, member post hi nikum August thla aṭang tawh khan hnawhkhah a ni lo. Hun rei tak hnawhkhah loha a awm hnuah, sorkar laipui hian model code of conduct puan a nih hnuah member thar tur hi a ruat leh si a ni tiin, hei hi politics khelhna hmanrua atan an hmang niin Congress chuan a puh.