PM Modi thusawi chungchanga complaint lutte ECI-in a ngaihtuah dawn tih a sawi

Rajasthan-a BJP election rally buatsaiha prime minister Narendra Modi thusawi dan chungchanga complaint lutte chu Election Commission of India (ECI) chuan a ngaihtuah tur thu an sawi.

PM Modi hian Pathianni khan Rajasthan-a election rally neihnaah central-a Congress-in sorkarna an siam a nih chuan mipuite ram leh rangkachak Muslim-te hnenah an sem darh dawn niin a sawi a, an manifesto-ah pawh hmuh theiha a awm thu a sawi a ni. PM Modi-a thusawi avang hian lungawi lohna lantir bakah complaint lut eng emaw zat a awm a, heng complaint-te hi ECI chuan an dawn thu leh, commission-in a ngaihtuah tur thu an sawi a ni.

Prime Minister-in rally-a a thusawi avang hian Congress chuan Election Commission hnenah complaint theh lutin, PM Modi chuan dawt a sawi thu te, sakhua leh sakhua bakah, sakhaw zuitute inkara inhuatna tuh tumah puhin, an manifesto-ah PM thusawi chu engmah a awm loh thu an tarlang a ni. Congress hian PM Modi lakah hian EC-in action an lak ngei an phût thu an sawi a, EC-in action a la lo a nih chuan Supreme Court thlen an tum thu an sawi bawk. Congress hruaitu leh advocate ni bawk, Abhishek Singhvi chuan 2019-ah pawh Prime Minister leh Home Minister lakah Supreme Court a thlen tawh thu sawiin, tunah pawh hian EC hian thutlukna a siam fel vat loh chuan Supreme Court thlen leh ngei a tum thu a sawi a ni.

PM Modi lakah complaint luh belh

Congress bakah hian eptu party, Communist Party of India (Marxist) chuan PM thusawi chu ram pawisawina a nih thu tarlangin, ECI hnenah PM laka action lak phûtin complaint an theh lut ve bawk. Jammu & Kashmir-a National Conference (NC) president Dr. Farooq Abdullah leh Peoples Democratic Party (PDP) president Mehbooba Mufti te chuan PM Modi-a'n Muslim-te a sawi dan avanga an lungawi loh thu sawiin, BJP chuan thuneih an duh luatah Muslim an huatna an thup seng lo a, hei hian Hindu-te hmel a tichhe tel a ni, an ti.

Poitical party bakah Karnataka-a pawl hrang hrang inzawm khawmte chuan Chief Electoral Officer (CEO) hnenah Rajasthan election rally-a PM Modi-a'n Muslim-te huatna tuh thei zawnga thu a sawi avang hian action lak ngei an phût thu thlenin, lungawi lohna an lantir. Bangalore-a People’s Union for Civil Liberties (PUCL) general secretary, Aishwarya R chuan PM Modi hi thubuai siamsak an duh thu leh, dan ang taka ECI-in PM Modi chu disqualify-a, inthlan a hmachhawn phalsak lo turin an ngen. Karnataka pawl hrang hrang kal khawmte hian Rajasthan rally-a PM thusawi chu thudik lo leh Muslim laka huatna chi tuh thei hawi a nih thu tarlangin, Maharashtra leh Rajasthan-a pawl ṭhenkhatte pawhin complaint an theh luh ve thu a sawi bawk.

Assam, Arunachal Pradesh, Meghalaya, Nagaland leh Manipur-a pawl hrang hrang inzawm khawmte pawhin Rajasthan-a Modi thusawi dan chu an dem thu sawiin, thuchhuah an siam bawk a, PM chu Model Code of Conduct (MCC) bawhchhiahah puhin ECI chu PM laka action la tura an duh thu an tarlang bawk a ni.