May 7 thleng Kejriwal a tang chhunzawm dawn

Delhi rouse avenue court chuan Delhi excise policy thubuai avanga Enforcement Directorate (ED)-in March 21-a an man, Delhi chief minister, Arvind Kejriwal chu May 7 thleng Tihar jail-ah tang chhunzawm turin a chungthu a rel.

Rouse avenue court-a special judge, Kaveri Baweja chuan Arvind Kejriwal hren a nih hun chhung tur chu ni 14-a pawhsei a nih thu hi a sawi a, court hian Kejriwal-a'n chhuah (bail) lailawk leh chhuah a dilna chu a lo hnawl tawh bawk a ni.

Arvind Kejriwal hi ED chuan Delhi excise policy thubuaia a bultumtu leh pawisa chheprelh niin an puh a, March 21-a man a nih hnuah Tihar jail-ah dah niin, Kejriwal hian man a nihna hi khing mah se, court hian hren chhunzawm a nih tur thu a puang ta zawk a ni. Kejriwal bakah hian Delhi excise policy thubuaia ED-in April 15-a an man, Telangana-a Bharat Rashtra Samithi (BRS) hruaitu K. Kavitha chu court hian May 7 thleng hren chhunzawm tur a nih thu a tarlang tel bawk.