India siam masala-ah cancer thlen theitu hmu chhuak; Singapore leh Hong Kong-in an rama thawn khap

India rama masala siamtu lian pahnih, MDH leh Everest-te masala siamah mihring hriselna atana him chin aia tam ethylene oxide hmuh a nih avangin, Singapore leh Hong Kong-te chuan an rama heng masala lak leh thawn luh an khap.

Kar hmasa khan Singapore hian an rama Everest Food Products Pvt., thil siamte an rama thawn luh a khap thu hi a puang a, hei hi an masala siama cancer thlen thei pakhat nia an sawi, ethylene oxide a tam lutuk nia an sawi vang a ni. Singapore-in an rama Everest masala lak luh a khap hnu hian Hong Kong pawhin MDH Pvt., leh, Everest Food Products Pvt., te thil siam ṭhenkhat; MDH siam Madras Curry Powder, Sambhar Masala Powder, Curry Powder leh Everest's Fish Curry Masala-ah te carcinogic pesticide an hmuh avangin heng masala ṭhenkhat lak luh hi a khap ve leh a ni. Singapore hian ethylene oxide hman chu phal mah se, a tlem thei ang ber hman tur a nih thu an sawi a, rei loteah lang chhuak lo mah se, a nghawng hi hun eng emaw ti hnuah chuan mihring tan a nasa lutuk a ni, an ti.

Singapore leh Hong Kong-a Indian embassy te chuan ram pahnihte sorkar hnenah hian an thil hmuhchhuah report kimchang a dil tawh a, MDH leh everest hnen aṭang pawhin an thil siam report kimchang pe turin a hriattir bawk. India commerce ministry chuan company pahnihte nena inkawmna an neih tur thu an sawi tawh a ni.

International Agency For Research on Cancer chuan ethylene oxide hi carcinogenic group 1-ah dahin, hei hi mihring tana cancer thlen theitu a ni tih lantirna a ni. Ethylene oxide hian kan thawk leh chaw lak luhna kawng aṭangin mihring taksaah hian an lut a, hei vang hian US Environmental Protection agency chuan hmeichhe tan hnute cancer leh chaw kawng cancer a siam hma bik niin an sawi.