Lok Sabha inthlan thawh hnihna : State leh UT 13-ah vote thlak leh dawn

Lok Sabha inthlan thawh hnihna chu vawiin hian neih a ni leh dawn a, state 12 aṭanga constituency 89 leh Union Territory (UT) pakhat aṭanga constituency pakhatah te vote thlak a ni ang.

Vawiina vote thlakna turte chu; Assam aṭangin constituency panga, Bihar aṭangin constituency panga, Chhattisgarh-ah constituency pathum, Karnataka-ah constituency 14, Kerala constituency 20, Manipur aṭangin constituency pakhat, Madhya Pradesh-ah constituency pasarih, Maharashtra constituency pariat, Rajasthan constituency 13, Tripura constituency pakhat, Uttar Pradesh constituency pariat, West Bengal-ah constituency pathum leh Jammu & Kashmir-ah constituency pakhat te an ni. Thawh hnihnaa vote thlak tur state zingah hian Kerala chuan constituency zawng zawngah vote an thlak nghal dawn a; Manipur, Rajasthan leh Tripura te hi vote thlak ṭum hnihna tur leh a hnuhnung ber tur a ni nghal bawk a ni.

Association for Democratic Reforms (ADR) leh National Election Watch te tarlan danin Lok Sabha inthlan 2024 thawh hnihnaa vote thlak tur constituency 88-ah hian candidate 1198 an awm a, constituency 14-a inthlang tur, Karnataka state-ah hian candidate tam berin, 247 an awm a ni. Inthlan chuh tur party lian zual hi 59 awmin, independent-a seat chuh tur mi 568 an awm bawk. Party tenau deuh leh a dang zawng zawng aṭangin mi 210-in seat an chuh ve dawn bawk a ni.

Candidate langsar tak tak zingah Rahul Gandhi chuan Kerala-a Wayanad aṭangin Lok Sabha seat hi a chuh dawn a, Congress hruaitu langsar ber pawl, Shashi Tharoor chuan Kerala-a Thiruvananthapuram LS seat chu BJP hruaitu, Rajeev Chandrasekhar nen an inchuh dawn bawk a ni. BJP aṭangin Hema Malini chuan Uttar Pradesh-a Mathura seat a chuh dawn a, Chhattisgarh chief minister hlui, Bhupesh Babhel chuan Rajnandgaon seat a chuh bawk ang. Anni bakah hian KC Venugopal, Om Birla leh HD Kumaraswamy te chu vawiina inthlang tur constituency-a seat chuh zingah an tel bawk.