NCP-in manifesto an tlangzarh

Sharad Pawar-a kaihhruai, Nationalist Congress Party (NCP-SP) chuan April 25 khan an party manifesto tlangzarhin, Jammu & Kashmir tana state pek an thlawp thu leh, One Nation, One Election an dodal thu an puang.

NCP hian an manifesto hming hi Shapatnama vuahin; caste census neih te, loneitute hamṭhatna atana commission hran din te, hna laka hmeichhiate tana 50% reservation siamte chu an ngaih pawimawh tur thu an tarlang a ni. Shapatnama-ah hian NCP chuan Citizenship (Amendment) Act (CAA) siam ṭhatna tur te, National Register for Citizens (NRC), Unlawful Activities (Prevention) Act (UAPA) leh constitution kalha dan siam dang reng rengte pawh zir chiang a, endik a, siam ṭhat ngai lai apiang siam ṭha tura hmalak an tum thu an tarlang.

NCP (SP) manifesto tlangzarhnaah hian Sharad Pawar chuan thu sawiin, Congress-in an manifesto-a loneitu, ṭhalai, hmeichhia, kuthnathawk leh caste census atana rorelna dik (Nyay) panga an dahte chu an thlawp thu sawiin, union agriculture minister pawh lo ni tawh Sharad Pawar hian, home minister Amit Shah-a'n agriculture tana a hnathawh tawh a hriat loh thu a sawi chu chhan tlaka a ngaih loh thu a sawi bawk.