Lok Sabha inthlan 2024 thawh hnihna neih a ni

Election Commission of India (ECI)-in Lok Sabha inthlanpui vawi 18-na thawh hnihna neih hun tura April 26 a ruat angin, nimin khan state leh Union Territory 13-a constituency 88-ah vote thlak a ni. Lok Sabha 2024 inthlan hi May 7, May 13, May 20, May 25 leh June 1-ah te neih chhunzawm leh tur a ni ang. Hriat theih chinah tlai dar 3 thleng khan Tripura-ah vote a tla ṭha ber a, 68.92% vote a tla a ni. Maharashtra-ah 43.01% vote tlain a tla chhe ber a, ram pum huapa vote tla hi tlai dar 3 thleng khan 50% a ni.

Kerala :

Nimina state inthlang zingah Kerala chuan constituency (20) zawng zawngah vote thlak nghalin, candidate 194 an awm a, vote nei mi vaibelchhe 2.77 an awm bawk. Kerala-ah hian polling booth 25,231 siam a ni a, zinga dar 7 aṭangin vote an thlak ṭan a ni. Kerala aṭang hian politician langsar tak tak zingah, Rahul Gandhi, Shashi Tharoor leh Rajeev Chandrashekhar te chuan Lok Sabha seat an chuh a ni.

Karnataka :

Karnataka-ah Lok Sabha seat 28 awmin nimin khan constituency 14-ah vote thlak a ni a, candidate 247 awm aṭangin mipa candidate 226 leh hmeichhe candidate 21 an awm. Karnataka-ah hian polling station 30,602 siam a ni a, voter vaibelchhe 2.88 an awm a ni. Karnataka-ah hian inthlan thawh thumna, May 7-ah constituency 14-ah vote thlak chhunzawm leh a ni ang.

Uttar Pradesh :

Lok Sabha seat tam berna Uttar Pradesh-ah hian inthlan thawh khatna aṭanga thawh sarihna thlengin vote thlak a ni dawn a ni. April 19-a inthlan thawh khatna neihah khan constituency pariatah vote thlak niin, nimina inthlan thawh hnihna neihah constituency pariatah vote thlak leh a ni. Constituency pariat-ah hian candidate 91 awmin, voter vaibelchhe 1.67 an awm a, polling booth 17,704 buatsaih a ni.

Rajasthan :

Lok Sabha seat 25 awmna Rajasthan-ah hian nimina inthlan thawh hnihna leh a tawpna neihah constituency 13-ah vote thlak a ni a, April 19-a inthlan thawh khatnaah khan constituency 12-ah vote thlak a lo ni tawh a ni. Constituency 13-ah hian voter vaibelchhe 2.8 an awm a, candidate 152 an awm.

Maharashtra :

Maharashtra-ah hian Lok Sabha seat 48 awmin, nimin khan constituency pariatah vote thlak a ni. Inthlan thawh khatna, April 19-ah khan constituency pangah vote thlak tawh a ni a, inthlan thawh ngana thlenga vote thlak tura ruahman a ni. Nimina vote thlakna constituency pariatah hian candidate 204 awmin, voter vaibelchhe 1.49 an awm a ni. Maharashtra-ah hian polling booth 16,589 siam niin, zing dar 7 aṭanga tlai dar 6 thleng vote thlakna hun hawn a ni.

Madhya Pradesh :

April 19-a inthlan thawh khatnaah khan Madhya Pradesh-a Lok Sabha seat parukah vote thlak tawh niin, nimina inthlan thawh hnihna neihah constituency pangaah vote thlak leh a ni. Madhya Pradesh-a Betul constituency-ah BSP candidate pakhat a boral avangin Election Commission of India (ECI) chuan vote thlak hun hi May 7-ah sawn a ni. Madhya Pradesh-ah hian Lok Sabha seat 29 a awm.

Chhattisgarh :

Maoist helpawlte an len avanga inthlan apianga buaina chhuahna ṭhin, Chhattisgarh-ah hian Lok Sabha constituency 11 awmin, nimina inthlan thawh hnihna neihah constituency pathumah vote thlak leh niin, thawh khatnaah khan constituency pakhatah vote thlak tawh a ni. Chhattisgarh-a inthlan thawh hnihna neihna constituency pathumah hian candidate 41 an awm a ni.

Bihar :

Bihar-ah hian Lok Sabha seat 40 a awm a, April 19 khan constituency 4-ah vote thlak tawh niin, nimin khan constituency 5-ah vote thlak leh a ni. Bihar-ah hian inthlan thawh sarihna thleng vote thlak chhunzawm a ni ang. Inthlan thawh hnihnaah hian candidate 50 awmin, voter nuai 93 chuang an awm a ni. Bihar-ah hian vote thlak hun hi zing dar 7 aṭanga tlai dar 4 thleng hawn tur ni mah se, polling booth ṭhenkhatah chuan khaw lum avangin tlai dar 6 thleng pawhsei a ni.

West Bengal :

West Bengal hi Uttar Pradesh ang thoin inthlan thawh khatna aṭanga thawh sarihna thlenga vote thlak tur state a ni. Lok Sabha seat 42 awmin, inthlan thawh khatnaah khan constituency pathumah vote thlak a ni. Nimina inthlan thawh hnihna neihah constituency pathum atan vote thlak leh a ni a, candidate 47 awmin, voter 51.17 an awm a, polling station 5,298 buatsaih a ni.

Jammu and Kashmir :

Union Territory zinga inthlan thawh hnihnaa vote thlakna awm chhun, Jammu & Kashmir-a Jammu constituency-ah hian candidate 22 awmin, voter nuai 17.81 an awm a, polling station 2,416 buatsaih a ni. Jammu & Kashmir-ah hian Lok Sabha seat panga awmin, inthlan thawh khatnaah khan constituency pakhat (Udhampur)-ah vote thlak a ni tawh a ni.