India-ah WhatsApp a tawp maithei

Whatsapp chuan Information Technology (IT) rules siam ṭhat avanga Delhi High Court-a thubuai an theh luhah, message encryption tihtawptir an nih chuan India an chhuahsan tur thu an sawi.

WhatsApp leh Facebook neitu, Meta chuan Information Technology (Intermediary Guidelines and Digital Media Ethics Code) Rules, 2021 siam ṭhat taka rule 4(2) hi an khing a ni. He dan siam ṭhatah hian social media hmanna tura kawng siamtu, a bikin message thawnna atana hman theih application-te chuan court rorelna emaw, thuneitute'n an mamawh ang zela message thawn chhuaktu hriat a nih theihna tur ruahmanna an siam tur a ni, tih a ni. He dan hi WhatsApp hian court-ah khingin, Whatsapp aiawha ding, advocate Tejas Karia chuan WhatsApp mipuiin an hman chhan chu a him vang a nih thu leh, mi pahnih inkara message reng reng chu encrypt vek a nih thu a sawi. Karia chuan, "Social media kaida pakhat kan ni a, a hmangtute himna ngaihthah a, message encryption hi titawp tura min tih chuan WhatsApp hian India hi a chhuahsan ve ang," tiin, Acting Chief Justice Manmohan leh Justice Manmeet Pritam Singh Arora te ṭhut bench hmaah a sawi.

Karia hian kumin February thlaa sorkar laipuiin Information Technology (Intermediary Guidelines and Digital Media Ethics Code) Rules 2021 a buatsaih chuan Whatsapp hmangtute privacy a palzut thu tarlangin, dan siam a nih dawn hian râwn an nih ve loh thu a sawi a, he dan avang hian WhatsApp chuan kum tam tak chhung message maktaduai chuang a dah ṭhat a ngaih phah bawk anga, hetiang hi khawvel hmun dangah a awm ngai lo a ni, a ti.