J&K-in kan ram humhimna tur dan kan nei ve lo : Omar Abdullah

Jammu & Kashmir chief minister hlui leh National Confe­rence hruaitu Omar Abdullah chuan ram chhunga state tam zawk, a bikin hmarchhak state-te chuan an state-a ram neitu nihna dinhmun humhimna tur dan an neih laiin, Jammu and Kashmir chuan a nei ve lo tih a sawi. 

Omar Abdullah chuan, "Himachal Pradesh, Sikkim, Meghalaya, Nagaland leh union territory-ahte chuan India mi pawh ni se, state/UT pawn lam  miten ram an lei thei lo a ni," tiin tunhnaia sorkar laipuiin Jammu and Kashmir-a pawn lam mite tan ram lei khapna dan a ṭhiah sak chungchang a sawichhuak. 

Srinagar-a NC headquarters-a inkhawm an neihah CM hlui chuan he thu hi sawiin, "Heng dan chungchang kan sawi hian keini chu anti-national tia puh kan ni thung ṭhin", a ti. BJP kaih­hruai sorkar laipui chu na taka bei letin, an ram leh hnam venhimna atan an bei zel dawn tih a sawi zui. 

Sorkar laipuiin J&K hnuh hniam leh ṭhendarhna turin kawng hrang hranga ṭan a lak thu Abdullah chuan a sawi a, hemi do letna atan hian tualchhunga political party hrang hrangte chuan ṭangrual pawl, 'People's Alliance' an din a ni, a ti. Ṭangrual pawl chu din hma se chuan BJP sorkarin J&K special status pekna a tihtawp sak pawh chu an lo dang thei maithei niin a sawi bawk. 

Abdullah kaihhruaiin ṭang­rual pawl hruaitute chuan nimin khan Kargil an tlawh a, tual­chhung hotute hmuin J&K land law siamṭhat chungchangte an sawipui a ni. 

October 27 khan Ministry of Home Affairs (MHA) chuan Jammu and Kashmir-a dan hman lai eng emaw zat siamṭhain, pawn lam miten ram (urban land and immovable property) an lei theihna tur Jammu and Kashmir Reorganisation (Adaptation of Central Laws) Third Order, 2020 a tichhuak a, hei hi J&K mite chuan an dodal nasa hle.