Information Commissioner thar tur Congress in duh lo

Sorkar laipuiin Information Commissioner thar atana ruat a tumte chu Congress party chuan an duh lo. 

Sorkar chuan  Indian Foreign Service (IFS) officer hlui Yashvardhan Kumar Sinha chu Chief Information Commissioner (CIC) of India atan leh, journalist Uday Mahurkar chu Information Commissioner atan ruat a tum a, hemi atana thil ṭulte a buaipui mek nia sawi a ni. 

Hemi chungchanga hriat­tirna hi Rashtrapati Bhavan chuan a tichhuak thuai dawn a, hemi hnu hian ruat a nih chungchang hi Department of Personnel and Training (DoPT) chuan Gazette Notification hmangin a tichhuak ang. 

Congress party chu Infor­ma­tion Commissioner atana Udhay Mahurkar ruat tum chung­changah a lungawi lo hle a, Lok Sabha Congress MP Adhir Ranjuan Chowdhury chuan Mahurkar chu commissioner seat ruak hnawhkhah tur dilna thehlut zingah a tel loh thu leh,  langsar taka BJP thlawptu a ni tih a sawi.

CIC diltu hi mi 139 an awm a, information commissioners hi mi 355-in an dil bawk. Chowdhury chuan CIC atana sorkarin a ruat tum Yashvar­dhan Kumar Sinha hi CIC ni tura service delivery, law, science, human rights leh general public issue lama hriatna nei lo a nih thu a sawi bawk.