J&K-ah firfiak-te'n BJP worker pathum an that

Jammu and Kashmir-a Kulgam district-ah Ningani tlaiah khan firfiak nia rinhlelhte chuan  BJP worker pathum an that a, chung zingah chuan Bharatiya Janata Yuva Morcha (BJYM) district general secretary pawh a tel.

BJYM GS Fida Hussain Yatoo bakah hian party worker pahnih dang Umar Ramzan Hajam leh Umar Rashid Beig-te chu South Kashmir-a Y K Pora khuaah firfiakte'n an kap hlum tih police-te chuan an sawi. Yatoo hi an kahna hmunah hian a thi nghal a, midang pahnih erawh hi chu damdawi-in panpui an nih laiin an thi niin a sawi thung.

Police-te chuan thubuai ziah luh nghal a nih thu sawiin, J&K police, Indian Army leh paramilitary force ṭangrualte chuan beihpui thlak chhun­zawm nghalin inkahna thlenna chhehvel chu an hual nghal a ni. 

Kumin chhung hian Kashmir hmun hrang hrangah BJP worker pakua vel thah an ni tawh a, heng pawikhawihna tam zawk hi South Kashmir-a thleng a ni.