BJP leh Congress-in Supreme Court-ah hun an dil belh

Model Code of Conduct (MCC) bawhchhiaa inpuh tawna, Election Commission of India (ECI) hnena an zualko avanga insawi fiahna theh lut tura hriattir an nih chungchangah Bhartiya Janata Party (BJP) leh Congress chuan Election Commission hnenah hun an dil belh.

EC hian April 25 khan BJP hruaitu, JP Nadda leh Congress hruaitu, Mallikarjun Kharge chu an party ve vete'n MCC bawhchhiaa an inpuhna chungchangah insawi fiah turin a hriattir a, insawi fiahna hun atan hian April 29, chawhma dar 11 thleng kha hun a pe. Hetih lai hian party pahnihte hian EC-in hun a pek chhung hian insawi fiahna an theh lut hman lo a, BJP hian kar khat hun pek belh tura dilin, Congress hian ni 14 chhung hun an dil belh ve thung a ni. EC hian BJP president, JP Nadda leh Congress president, Mallikarjun Kharge te hnenah hian MCC an bawhchhiat thu hriattirin, party star campaigner-te chu fimkhur turin an chah bawk.

BJP leh Congress te'n MCC bawhchhiaa an inpuhnaah hian Congress hian BJP hruaitu, prime minister Narendra Modi chu Rajasthan-a an party rally-a thu a sawinaah Congress manifesto dik lo taka sawi leh, sakhaw ṭhenkhat inkara hem thlak tum zawnga thu sawiah an puh a, Congress bakah party dang eng emaw zatin PM Modi lakah hian complaint an theh lut ve bawk a ni. BJP hian Congress hruaitu Rahul Gandhi chu Kerala-a a thu sawinaah PM Modi chungchang dik lo taka sawiah puhin, Congress party president Mallikarjun Kharge pawh Ram temple hawnnaa BJP-in president Droupadi Murmu an sawm loh chhanah scheduled tribe a nih vang tia a sawi thu an tarlang a ni.