Karnataka polling station pakhatah vote thlak ṭha

Karnataka-a Hanur khuaa Indiganatha polling station-ah Thawhṭanni khan vote thlak ṭhat a ni a, he khua hi Chamarajanagar Lok Sabha constituency hnuaia awm a ni. Thuneitute chuan boruak muanawm tak hnuaia tluang taka vote an thlak theih thu an sawi.

Karnataka chief electoral officer, Manoj Kumar Meena chuan Indiganatha polling station-ah hian April 26 khan vote thlak tura ruahman a nih laiin buaina chhuakah Electronic Voting Machine (EVM) tihchhiat a nih thu sawiin, Election Commission of India chuan vote thlak ṭha turin ruahmanna a siam leh ta a ni, a ti. CEO Manoj Kumar chuan ECI thu anga vote thlak ṭhat a nih hian tluang taka inthlanna neih a nih thu leh, vote a tlak ṭhat thu a sawi bawk.

Hanur khuaah hian Lok Sabha inthlan puan a nih hnuah an khuaa hmasawnna hna thawh a ṭhat loh avangin inthlan boycott an tum thu hi an puang a, mahse, thuneitute nen inbiakna neiin, an duh anga hmalak vat tiam an nih hnuah vote thlak tur hian ruahmanna siam a ni ta a ni. Hetih lai hian vote thlak niah mi ṭhenkhat chu la lungawi loin inthlan boycott an tum tlang a, ṭhenkhatin vote thlak an tum bawk si avangin buaina a chhuak ta a ni. He buaina chhuak avang hian polling station-a EVM chu tihchhiat a nih thu district thuneitute chuan an tarlang.