UGC-NET exam hun sawn hla

University Grants Commission (UGC) hnuaia National Eligibility Test (NET) neih tur chu UPSC preliminary exam hun nen a inrual dawn avangin sawn a nih thu UGC chairman, Jagadesh Kumar-a'n a sawi.

NET exam hi June 16-a neih tura ruahman a ni a, mahse, June 18-ah sawn a ni. NET exam hun sawn thu hi UGC chairman hian puangin,"National Testing Agency (NTA) leh UGC chuan June 16-a NET exam neih tura ruahman chu June 18-ah sawn turin thu kan titlu ta a ni. Hei hi zirlai exam turte'n UPSC preliminary exam nen a inrual avanga harsatna an neih thu an sawi vang a ni a, NTA hian ram pum huapa ni khata exam vek turin UGC-NET exam hi a buatsaih ang," a ti.

UGC hnuaia NET exam hi ram chhunga university leh college hrang hrang a Junior research fellowship leh assistant professor atana rawih tur bakah, PhD ti tura tlin leh tlin loh tehfung niin, India khua leh tuite tan chauh exam theih a ni.