Kejriwal man a nih hun chungchangah SC-in insawi fiah turin ED a hriattir

Delhi chief minister, Arvind Kejriwal-a'n Delhi excise policy thubuai avanga Enforcement Directorate (ED)-in an man dan a dik lo tia a khinna chungchangah, Supreme Court chuan ED chu Lok Sabha inthlan hma khera Kejriwal an man avanga insawi fiah turin a hriattir.

Justice Sanjiv Khanna leh Dipankar Datta te ṭhut Supreme Court bench hian Thawhṭanni aṭang khan Arvind Kejriwal-a'n man a nih danah thil dik lo a awm tia a khinna hi an ngaihtuah a, court hian ED hi Lok Sabha inthlan atana Model Code of Conduct (MCC) puan a nih hnu lawka Kejriwal an man chhan chungchangah insawi fiah tur hian a hriattir a ni. Kejriwal thubuai siamsak kaihhnawihah action lak engmah a la awm lo a, a lo awm a nih chuan an puhnaah Kejriwal chu eng ang chiahin nge a lo inhnamhnawih tih Justice Khanna chuan ED chu a zawt a, Zirtawpni ral hmaa chhanna pe turin an ti bawk.

Arvind Kejriwal hi March 21 khan ED-te hian an man a, Tihar jail-ah dah niin, a tan hun tur hi May 7 thleng pawhsei mek a ni. Hetih lai hian Kejriwal hian Supreme Court leh Delhi High Court-ah te man a nih dan a dik loh thu leh jail aṭanga chhuah turtein a lo thlen tawh a ni. Kejriwal-a aiawha ding, advocate AM Singhvi chuan ED-in misual tawrawt tak emaw, firfiak tlan bo tur emaw ang maia an man chu engtiang chiaha ṭul nge a nih a, chief minister pawikhawih tawh man loh an nei fo tawh zawk, tiin a zawt.

Kejriwal hian a petition theh luhah hian man a nih hun chu Lok Sabha inthlanpui lo awm tur avanga rorel lai party, BJP-in eptu party-te nek chepa, tihchhiat vek a tumna a nih thu a sawi a ni.