Kum 50 hnua Kolkata khawpui lum ber ṭum a thleng

West Bengal khawpui, Kolkata-ah chuan Thawhlehni khan kum 50 chhunga khua a lum ber ṭum thlengin, khaw lum ber lai hian 43 degree celcius a kai a ni.

West Bengal Meteorological department chuan Kolkata-a Alipore observatory-in khaw lum lam an chhinchhiahna tarlangin, Thawhlehni khan Kolkata khawpui lum lam chu 43 degree celcius a ni pha. Salt Lake area-ah hian khaw lum lai berin 43.5 degree celcius niin, North 24 Parganas district-a Barrackpore chhehvelah chuan khaw lum lam hian 44.6 degree celcius a thleng hman hial niin an tarlang bawk. Panagarh, Mendipur leh Bankura-ah te chuan Thawhlehni khan 45.6, 45.5 leh 45.1 degree celcius te a kai hlawm bawk a ni.

Meteorological department chuan West Bengal-ah hian May 3 thleng chu khaw lum hian zual lam a la pan chhunzawm zel dawn niin an tarlang a, khaw lum zualna hmunte hi an state chhim leh thlang lam a nih thu sawiin, khaw lum nasat chhanah hian khawthlang thli ro tleh (dry westerly winds) leh ni zung an dawn nasat bik vang niin an sawi.