Delhi Congress unit president atan Devender Yadav ruat

Congress Delhi unit president a nihna aṭanga Arvinder Singh Lovely a ban avangin Congress chuan Delhi unit president dinhmun lo chelh lailawk turin Devender Yadav an ruat thu an puang.

Congress hian thuchhuah siamin, Mallikarjun Kharge chuan Delhi Pradesh Congress Committee (DPCC) president lailawk atana Devender Yadav a ruat thu hi an tarlang a, Yadav pawhin party hruaitute'n an rin ngamna chu lawmawm a tih thu leh, Congress party thil tum tipuitling tura theihtawpa hnathawh a tum thu a sawi ve bawk.

Yadav hi All India Congress Committee (AICC) Punjab in-charge niin, kum 2008 leh 2013 ahte khan Badli constituency aṭangin MLA tura thlan tlin a ni a, 2015 khan APP candidate, Ajesh Yadav a hneh zo lo thung a ni.

Delhi-ah hian Congress hian Lok Sabha inthlanpui neih mekah Aam Admi Party (AAP) nen an thawh dunna tur an tinghet a, hei vang hian Delhi-a Congress hruaitu eng emaw zat chuan sawiselin, Delhi unit president ni lai, Arvinder Singh Lovely chuan banna a theh luh phah a ni. Arvinder Singh a ban avang hian Congress chuan Devender Yadav hi Congress Delhi unit president atan hian an ruat nghal a ni.

Delhi-a Lok Sabha seat pasarihah May 25 hian vote thlak a ni dawn a, AAP leh Congress-te hian seat chuh tur insemin, an thawk dun dawn a ni. AAP nena thawh dunna tur an tihfel avanga a ban hnu hian Arvinder Singh hian party hruaitute chu unit duh dan ngai pawimawh loah a puh a ni. Arvinder Singh bakah hian Delhi-a Congress hruaitu pahnih; Neeraj Basoya leh Naseeb Singh te chuan AAP nena thawh dun an duh loh avangin banna an theh lut ve tawh bawk.