Delhi Commission for Women-a thawk mi 223 ban

Delhi Lieutenant Governor, VK Saxena chuan Delhi Commission for Women (DCW)-a dik lo taka thawktu lak nia hriat mi 223 a ban. Heng thawktu mi 223-te hi Aam Admi Party (AAP) MP, Swati Maliwal-i'n DCW chairperson a nih laia dan loa a lakte niin a sawi.

Lieutenant Governor-in thuchhuah a siamah zir chianna an neih aṭanga February 2017-a report an theh luh bawhzuiin mi 223-te hi ban an nih thu leh, DCW-ah hian thawktu mi 40 awm thei tura ngaih a nih laiin mi 223 zet chhawr belh an ni a, hengte hi Lieutenant Governor hriatpuina tel loa lak an nih thu a tarlang a ni.

DCW hian thawktu lak belh tur hian thuneihna a nei lo a, lak an nih hma hian an hnathawh tur emaw, post siam felna emaw pawh engmah a awm lo niin an tarlang bawk. Thuchhuahah hian DCW chuan finance department remtihna tel lo chuan sorkar tana sum sen belh theihna tur thil awm reng rengah hma an la tur a ni lo, an ti bawk a ni. Lieutenant Governor hnena DCW zir chianna report theh luhah hian DCW-in thawktu 223 a lak danah dan zawm a nih loh thu te, thawktute hlawh leh hamṭhatna an dawn ang zawng zawngte pawh dan zawm chunga tih a nih loh bakah, ruahmanna awm sa pawh a awm lo niin an tarlang.

AAP MP, Swati Maliwal erawh chuan Lieutenant Governor-in DCW-a thawktu mi 223 a ban chungchangah hian contract anga rawih an nih thu sawiin, ban an nih avang hian DCW chuan hna a thawk thei dawn lo tih a sawi thung. Maliwal chuan tunah hian thawktu mi 90 an awm mek thu leh, an zinga pariat chu sorkar mi leh sa an nih thu te, a bak chu contract-a chhawr an nih thu te a sawi a, women commission chu tawptir mai a tum loh thu leh, amah chu hrem a, hmeichhiate tihrehawm lo turin Lt. Governor hi a bei zui a ni.