Rahul Gandhi thubuai ngaihtuah hun tur sawn

Rahul Gandhi-a'n intihhmingchhiat thubuai a neih mek, kum 2018-a union home minister Amit Shah chungchang mawi lo leh dik lo taka sawia puh a nihna chu a ngaihtuahtu tur, MP-MLA court judge ruat a la nih loh avangin May 14 atan sawn a ni.

Rahul Gandhi aiawha ding ukil, Kashi Prasad Shukla chuan Amit Shah tihhmingchhiat chungchanga Rahul Gandhi puh a nihna thubuai hi May 2-a ngaihtuah tura thu tihchhuah tawh ni mah se, MP-MLA court-a ṭhu tur judge dah a la nih loh avanga May 14-a sawn a nih thu hi a sawi a ni.

Kum 2017 May thla khan Rahul Gandhi hian Bengaluru-a press conference a neihnaah Amit Shah chungchang hi dik tawk lo deuhin a sawi nia puh a ni a, hei vang hian BJP hruaitu, Vijay Mishra chuan August 4, 2018 khan complaint a theh lut a ni. Hemi ṭum hian Rahul Gandhi hian BJP chu politics thianghlim leh felfai duh si a tualthattu hruaitu nei niin a sawi.

Nikum December thla khan court hian Rahul Gandhi man a nihna tur hi a tichhuak a, February 20-a Amethi-a a awm laiin Gandhi hian Bharat Jodo Nyay yatra a neih mek a tihtawp a ngaih phah a, mahse, court hian Rahul Gandhi bail dilna chu pawmin, man a ni leh rih lo a ni.