ECI-in Telangana-a vote thlak hun chhung tur pawtsei

Election Commission of India (ECI) chuan khaw lum zual chho zel avangin Lok Sabha inthlan, May 13-a vote thlak tur, Telangana state-a assembly bial hrang hrangah vote thlak hun chhung pawhsei a nih thu a puang.

ECI hian Telangana-a ruahmanna hmasa, zing dar 7 aṭanga tlai dar 5 thleng vote thlak tura tih chu khaw lum tak kara mi tam zawkin vote an thlak theih nan zing dar 7 aṭanga tlai lam dar 6 thleng vote thlak hun pawhsei a nih thu a puang a ni. ECI thuchhuaha tarlan a nih danin Telangana chief electoral officer hnen aṭanga rawtna an dawn angin state assembly bial ṭhenkhata parliamentary constituency 17-ah vote thlak theih hun chhung hi pawhsei a ni, an ti.

MCC bawhchhiat avangin BRS president hrem

Election Commission of India (ECI) chuan Bharat Rashtra Samiti (BRS) president, K. Chandrashekar Rao chu Model Code of Conduct (MCC) bawhchhiaa puhin, ni hnih chhung campaign thei lo turin a hrem.

Telangana-a eptu party hruaitu, K. Chandrashekar Rao (KCR tia hriat) hian April 5 khan Sircilla-ah press mite kawmin, Telangana-a rorel lai party chu rukru sorkar siam leh dawt sawi avanga vote tlemte hmanga chak thei hram, hman tlak loh mihring awm khawm an ni, a ti. Hei bakah hian an thu tiam anga Rs. 500 bonus an pek loh chuan an thah tur thu a sawi tel bawk. Hei vang hian TPCC vice-president, G. Niranjan chuan KCR lakah hian thu dik tawk lo leh, thil rapthlak tak sawia MCC bawhchhia tiin complaint a theh lut a ni.

KCR thusawi avang hian ECI chuan article 324 bawhchhiaah puhin, mipui hmaa inlana inkawmna neih emaw, inthlan kaihhnawiha chetvelna reng reng neih phalsak a nih loh thu sawiin, May 17, 2019-ah leh November 4, 2023-ah te pawh ECI chuan KCR hnenah hian a thusawia fimkhur tura an lo hriattir tawh thu te an tarlang tel bawk.