Thinlaiah A Thar Leh ṬHin

Ṭau thla pawh a ral lek lek tawh, eng zan ber nge ka sawi chhuak mai thei ta lo, nghet tak maia ka zan mu chu chiang em em hian ka harh hlawl mai a, rang takin ka mutna sir maia ka mobile phone, han hmeh keuha dar zat lo lang ṭhin chu ka hmet chhuak a, zanlai arkhuang tur zawng zawng pawh lo khuang zo tawhin zinglam dar 1:35 vel hi a lo ni tawh.

Zan dangah chu'ng ang hunah chuan ka ṭhanharh ngai loh vang nge? chu hun chu a reh hian a reh vawng vawng a, ralkhata lirthei tlan thawm chu sawi loh, kan bul hnai vela leihrik hram ri tak ngial pawh hriat tur a awm lo, a reh hian a reh vawng vawng hi a ni ber.

Mutchhuak zawng zawng a reh bawk si, chu zan reh tak leh khawharthlak tak hnuaiah chuan 'ti hian suangtuahna a lo thleng ta: Tun hma kan naupan lai aṭanga puitling nun kan zir chhoh lai hunte ka chhui kir a. Chu'ng hun lai chuan tunlai hun anga changkannate lo her chhuakin, kan nun hi a tihdanglam rinna kan la nei pha lo hrim hrim kha a ni a, a hunlai mil angte khan kan nun, khawtlang nun kha nuam kan ti ve em em ṭhina.

Mahse, tunlai khawvelah chuan changkanna chi hrang hrangin min rawn luhchilh a : smartphone changkang em em lo mah se, kan mamawhna zawng zawng phuhru tho si aṭangin changkang em em, a neitute ngaihtuahna zawng zawng pawh a ṭawmpui ve ta hial emaw tih tur khawpa changkang ber ber thlengin mi tin ban phakah a lo thleng ta.

Chu smartphone chu a hmang thiam tan sumdawnna/eizawnna ṭangkai lutuk a nih mek laiin, keini ang hmang thiam lo tan erawh tun hma zawng zawnga chhungkua inkawm ngeih leh induhsak tawnna nena ei/in za ṭhinte kar dantu a lo tling thei ta tlat mai.

Nupa, khum khata mu dun mekte ngaihtuahna thlengin he kan smart phone hian a daidan mekte pawh kan lo awm thei mai ang em? tiin chu zan hun laklawh takah chuan ngaihtuahna ka lo hmang mek a. Kan ṭhalaite nun thleng hian eng ang chiahin nge he kan smartphone hian Zofate min la run zel ang aw? tia ka ngaihtuah mek lai chuan heti taka changkanna; a hmang thiam lo tana chhiatna ni si, Zoramin kan lo mikhual hma hunte kha mitthlaah lo lang uar uarin, kha'ng hunlai kha thinlaiah a thar leh ṭhin. Thutlukna mumal pawh siam hman lovin ka muhil chhunzawm ve leh ta a.

- Lawta Khiangte