Rahul Gandhi-a'n Rae Bareli aṭangin LS seat a chuh dawn

Uttar Pradesh-a Amethi leh Rae Bareli Lok Sabha seat-te chu Gandhi-te unauin chuh se an duh thu Congress Central Election Committee (CEC)-in a sawi hnuah, nimin khan Rahul Gandhi chuan Rae Bareli aṭanga Lok Sabha seat chuh turin nomination a theh lut.

May 20-a inthlang tur, Uttar Pradesh-a Amethi leh Rae Bareli seat-te hi Gandhi chhungkaw enkawl reng ṭhin bial a ni a, Amethi hi Rajiv Gandhi chuan kum 1981 leh 1991 inkar khan a lo enkawl tawh a, Rahul Gandhi hian 2004, 2009 leh 2014-ahte hnehna lo chang tawh bawkin, 2019 inthlanah khan BJP candidate, Smriti Irani a hneh lo thung.

Amethi-ah hian Rahul Gandhi hi ding leh tura beisei ni mah se, Congress party hian Kishori Lal Sharma hi an dah thung a, BJP candidate, Smriti Irani nen an inkhing dawn a ni. Kumin hi India rama Lok Sabha inthlan hmasak ber aṭanga chhutin, Amethi-a Gandhi chhungkuaa miin seat an chuh loh ṭum khatna a ni.

Rae Bareli hi Feroze Gandhi-a'n a lo enkawl tawh ṭhin a, Lok Sabha inthlan hmasak berah hnehna a chang a ni, ani hnuah hian Indira Gandhi chuan enkawlin ṭum khat hnehna a chang zo lo a, 2004 aṭang khan Sonia Gandhi-i'n enkawl chhunzawm lehin, Rajya Sabha member atana thlan a nih tak avangin a bial hi a chhuahsan a ni. Rae Bareli-ah hian Priyanka Gandhi Vadra chu ding tura beisei a nih laiin inthlan chuh a tum loh thu a sawiah a la ding tlang a, Rahul Gandhi chuan he seat aṭang hian Lok Sabha inthlan a hmachhawn leh dawn a, MP a nih mekna bial, Kerala-a Wayanad aṭangin LS seat hi a chuh tel bawk a ni..

Congress party hian Uttar Pradesh-a Lok Sabha seat 80 awm aṭangin seat 17 an chuh dawn a, a bak seat 63 hi INDIA-a an thawhpui, Samajwadi Party leh regional party dangte'n an chuh ve thung dawn a ni. Kar hmasa khan CEC hian Rahul Gandhi hi Amethi-a ding tur leh, Priyanka Gandhi Vadra hi Rae Bareli-a ding tura an duh thu a lo sawi tawh a, seat chuh tura nomination theh luh ni hnuhnung berah Rahul Gandhi hian Rae Bareli aṭanga LS seat a chuh tur thu hi puangin, Priyanka Gandhi Varda erawh chuan inthlan hrim hrima candidate nih a tum lohnaah a ṭang tlang. Amethi seat hi Kishori Lal Sharma chuan a chuh dawn a, ani hi Gandhi chhungkaw hnaih tak leh inthlan kaihhnawiha Congress tana thawktu pawimawh tak niin, kum 1998 hnua Amethi biala Congress party-in Gandhi chhungkaw member ni lo candidate atana an ruat hmasa ber a ni.

Rahul Gandhi hian nimina nomination a thehluh hnuah roadshow a nei zui nghal a, Congress president Mallikarjun Kharge bakah an party hruaitu dangte'n an telpui a, a nu Sonia Gandhi leh a farnu Priyanka Gandhi Vadra-te pawhin an telpui bawk a ni.