Amit Shah video lem siam kaihhnawihah Congress mi 5 man

Union home minister Amit Shah thusawi lai video lem siam a nih chungchangah Telangana police-te chuan Congress party mi panga an man. He video hi BJP chuan a lem a nih thu sawiin complaint an theh lut a ni.

Amit Shah video lem siam a nih avang hian Thawhlehni liam ta khan Delhi-a Intelligence Fusion and Strategic Operations (IFSO) chuan state hrang hrang pasarih vel aṭangin mi 16 thu zawh fiah tur an lo ko tawh a, koh zingah hian Telangana chief minister pawh a tel.

Thubuai chhuina kal zelah Ningani khan Congress mi panga man an ni leh a, Telangana Congress Media Convenor Kamal Medagoni chuan Telangana cyber crime unit police-te'n Telangana Congress social media convenor, Naveen leh Taslima te bakah mi pathum dang an man tel thu a sawi.

Telangana-ah hian Amit Shah hian inthlan kaihhnawihah thu sawiin, BJP-in sorkarna an siam a nih chuan constitution kalh zawnga Muslim tana reservation siam chu an tihtawp tur thu sawiin, constitution kawhhmuh anga SC, ST leh OBC-te'n reservation dik tak an neih theih nan hma an lak tur thu a sawi a ni. Hetih lai hian Amit Shah video lem siam darh taah hian union home miniser Amit Shah hian reservation siam hrim hrim chu BJP chuan an dodal thu a sawi anga lantir a ni.

BJP Telangana unit-te hian cyber crime police station-ah hian Telangana chief minister lakah complaint an lo theh lut tawh a, an complaint theh luhah hian Telangana Congress Pradesh Congress Party chuan an social media-ah Amit Shah thu sawi lai video tihdanglam leh siam chawp an post tiin an tarlang.