Sorkar laipuiin criminal law thar hmangin police training pe dawn

Sorkar laipuia Ministry of Home Affairs (MHA) chuan ram chhung hmun hrang hranga police leh tan ina venhim hna thawktute tan, sorkarin criminal law thar a siam hmanga training pek vek tura ruahmanna siam tawh a nih thu an puang.

MHA hian police hotute leh prison department hotute hnenah hian, nikuma parliament-in Indian Penal Code, 1860, Code of Criminal Procedure, 1973 leh Indian Evidence Act, 1872 te thlakna tura a duan; Bharatiya Nyaya Sanhita 2023, Bharatiya Nagarik Suraksha Sanhita 2023 leh Bharatiya Sakshya Adhiniyam 2023 te chuan an la hmelhriat ngai loh dan thar eng emaw zat a ken tel avangin police mi leh sa zawng zawng tana training pek an tum thu an hriattir a ni.

Criminal Law tharte hi July 1, 2024 aṭanga hman ṭan tura ruahman a ni a, home ministry chuan dan tharah hian tunlai khawvel nunphung mil leh, changkanna mil zela dan danglam leh thar a awm thu te, chungte chu police-te'n an hmelhriat a, an hman thiam a ṭul thu te, chumi atana training pek tum an nih thu te an tarlang a ni. Dan thar inzirtirna tura police-te training pe tur hian MHA hnuaia Bureau of Police Research & Development (BPR&D) chuan ruahmanna hrang hrang siamin an kalpui dawn a, BPR&D-te hian training-na tura ruahmanna an siamte hi state leh UT zawng zawng hnenah pein, mahni state ṭheuha Police Training Institute-ah training hi neih tur a ni dawn a ni.