AAP-in Arvind Kejriwal thlawp nan kawng an zawh

Delhi-a rorel lai, Aam Admi Party (AAP) chuan an party hruaitu leh chief minister, Arvind Kejriwal-a, Delhi excise policy thubuai avanga jail-a awm mek thlawpna lantir nan kawng zawh an buatsaih.

Kawng zawhnaah hian AAP hruaitu langsar tak tak; Sanjay Singh, Gopal Rai leh Saurabh Bharadwaj te an tel a, kawng zawhte hian au hla hrang hrang hmangin chief minister an thlawpna hi an lantir a, Kejriwal man a nih an dodal thute an aupui bawk a ni. AAP hruaitute hian pung khawmte hmaah thu sawi bawkin, Sanjay Singh chuan Kejriwal-a'n chief minister ni chunga Delhi mipute tana hna ṭha tak a thawh mek laiin Modi-a leh a pawlte'n manin, misual ang maiin an sawngbawl a, Delhi mipuite tana damdawi a thlawn a pe ṭhin kha, tan inah a mamawh insulin pawh pek a ni ve lo tiin, Delhi mipuite chu rorelna dik a awm theih nana Kejriwal-a tana ṭangrual turin a chah.

Arvind Kejriwal hi March 21 khan Enforcement Directorate (ED)-te chuan manin, tunah hian Tihar jail-ah a awm mek a, May 7 thleng tang tura tih a ni. Kejriwal hian man a nih dan chungchangah thil dik lo a awm tiin Delhi high court-ah petition a theh lut a, high court hian petition hi ngaihtuah mekin, Justice Khanna leh Justice Dipankar Datta te ṭhut bench chuan Arvind Kejriwal-a petition theh luh anga Lok Sabha inthlan avanga bail pek mai an rilruk thu ED hi an hriattir tawh a ni.