J&K-a helpawlin sipai an lambunnaah IAF mi pakhat a thi

Jammu & Kashmir, Poonch district-ah Pathianni khan Indian Air Force (IAF) convoy chu helpawl tu tih hriat lohte'n an lambun a, inkahna chhuak zuiin, IAF mi pakhat a thih bakah mi paliin hliam an tuar a ni.

IAF convoy hi Poonch district chhunga radar ṭhenkhat siam ṭhat hna thawka chhuak, Sanai top lama let leh mek a ni a, air base lama a letna kawngah hian helpawlte hian an lo lambun a ni. Helpawlin convoy motor an lo lambunah hian Military Engineering Services (MES) leh IAF motor-te kah an ni a, IAF lam hian an kap let ve bawk. Inkahna thlengah hian IAF mi panga chuan hliam an tuar a, military hospital hnai ber, Udhampur-ah helicopter-a phurh nghal ni mah se, an zinga pakhat hian a hliam tuar loin a boral ta a ni.

Helpawlin IAF an lo lambun avang hian IAF thupuangtu chuan army-in helai chhehvela helpawl awmte dap chhuak tura beihpui an thlak nghal thu a sawi a, army-te bakah hian J&K police-te chuan beihpuithlak hi ṭawiawmin, Shahsitar, Gursai leh Sheendara top thlengin helpawl dap chhuak tur hian an bei nghal a ni, a ti. Poonch district-a Rajouri belt-ah hian sorkar laipuiin J&K tana inhungbikna, article 370 a hlih hnuah helpawl beihna a thleng nasa zual a, kumin chhung hian helpawl beihna ṭum thum a thleng tawh a ni.