Sorkar laipuiin purunsen thawn chhuah khapna a hlip

Thla ruk zet khapna siam a nih hnuah sorkar laipui chuan India aṭangin purunsen thar chhuahte chu ram pawn lama thawn chhuah theih a ni leh tawh tih a puang a, a thawn chhuah dan phungah ruahmanna a siam bawk.

Sorkar laipui hian purunsen thawn chhuak tur hian minimum export price a siam a, purunsen ton khat zelah USD 550 chawi tur niin, hei hi kg 1-ah Rs. 46 zel anga chhut a ni. Purunsen thawn chhuak tur hian export duty 40% lak tur a nih thu a puang tel bawk. Sorkar laipui hian nikum December thla khan thil man sang tur ven nan leh ram chhunga purunsen indaih lohna a thlen hlauh avangin ram pawn lama thawn chhuah hi a lo khap tawh a, April 25 khan Gujarat-a purunsen thar chhuahte chu ton 2,000 bi zela thawn chhuah phal lehin, tunah hian India rama purunsen thar chhuah hrim hrim thawn chhuah khapna zawng zawng chu a hlip ta a ni.

Khawvel pum huapin tun hnaiah purunsen man a sang nasa hle a, hei hi ram anga purunsen thar chhuak hnem; India, Pakistan leh Egypt-te'n purunsen thawn chhuah an khap vang a ni. Egypt hian thla hmasa khan purunsen thawn chhuah khapna hi a lo hlip tawh a, Pakistan pawh hian tun hnai mai khan khapna hi a hlip ve tawh bawk.