Canada-ah Hardeep Singh Nijjar thah thubuaiah India mi pathum man

Canada police-te chuan nikuma Khalistan firfiak pawl hotu, Hardeep Singh Nijjar thah a nih thubuai an chhui zuina kal zelah India mi pathum an man thu leh, an mi mante hian India sorkar nena inzawmna an neih leh neih loh an chhui mek thu an puang.

India mi pathum, Canada police-in an mante hi Alberta-a Edmonton khuaah man an ni. India mi man chungchangah hian Foreign Minister, S. Jaishankar chuan,"Canada-a Hardeep Singh Nijjar thah a nih thubuai kaihhnawihah rinhlelh man an nih thu kan lo hria a, chanchinthar aṭanga kan lo thlirin an mi mante hi India mi, gang vela tel ṭhin nia hriatte an nih avangin Canada police-te hnen aṭang hian thu chiang zawk kan la nghak mek a ni," a ti. Canada-a India high commissioner, Sanjay Verma pawhin Canada police-te'n thubuai an chhui zuina aṭangin heng mite hi an man tih kan hria a, Canada tualchhung buaina a nih avangin engmah sawi belh tur kan nei rih lo tiin, India mi man an nih chungchangah hian Canada sorkar aṭanga thil chinchang hriattir an nih ve a beisei thu a sawi bawk.

Hardeep Singh Nijjar hi India rama Khalistan firfiak pawl hotu niin, Canada-ah hian a biru a, nikum June thla khan Canada-a Vancouver, Surrey-a Gurudwara pawnah kah hlum a ni. Canada leilunga Hardeep Singh thah a nih avang hian Canada sorkar chuan India sorkar chu an rama pawikhawihnaa inhnamhnawihah puhin, hun eng emaw chen chu ram pahnih inkar boruak hi a chhe hle hman a ni.