Constituency 94-ah Lok Sabha inthlan thawh thumna nei dawn

Lok Sabha inthlan thawh thumna chu vawiin hian state leh union territory 12 aṭanga constituency 94-ah neih a ni dawn. Vawiina constituency inthlang nen hian constituency awm zawng zawng; 543 aṭangin constituency 284-ah inthlan neih a ni dawn ta a ni. Inthlan thawh thumna atana campaign hi Pathianni tlai dar 6 khan tihtawp a ni.

Vawiina vote thlakna tur state zinga Assam, Chattisgarh, Goa, Gujarat, Madhya Pradesh leh Uttar Pradesh-ahte BJP-in ro an rel mek a, Maharashtra leh Bihar-ah BJP leh a thawhpuite'n ro an rel mek. Congress sorkarna chu Karnataka state chauh niin, West Bengal-ah INDIA hnuaia a thawhpui, Trinamool Congress Party a sorkar mek bawk.

Lok Sabha inthlan hmasaah khan, vawiina vote thlakna tur seat 93 zingah seat 80 hi NDA hnuaia BJP leh a thawhpui party-te'n an la a, Congress kaihhruai United Progressive Alliance (UPA) chuan seat 11 chauh an la thung.

Constituency hrang hrang dinhmun

Lok Sabha inthlan thawh thumna hmachhawn tur state zingah hian Assam aṭangin constituency pali, Bihar constituency panga, Chhattisgarh-a constituency pasarih, Goa constituency pahnih, Gujarat constituency 26, Karnataka aṭangin constituency 14, Madhya Pradesh constituency pakua, Maharashtra constituency 11, Uttar Pradesh constituency 10, leh, West Bengal-a constituency pali bakah, Dadra Nagar Haveli leh Daman and Diu UT constituency pahnih leh Jammu & Kashmir-a constituency pakhat an tel.

Vawiina inthlan neihna tur zingah hian candidate pakhat thihna avanga April 26-a inthlan neih hun tura ruat sawn hlat tak, Madhya Pradesh-a Betul constituency pawh a tel dawn a ni. Hetih lai hian Jammu & Kashmir UT-a Anantnag-Rajouri constituency chu helpawl beihna avanga boruak muanawm a la awm loh avangin May 25-ah vote thlak tura sawn a ni thung. Gujarat-a Surat constituency-ah chuhpuitu nei loin BJP candidate chu tlinga puan a ni a, Karnataka-a constituency zawng zawngah inthlan neih zawh a ni tawh dawn bawk a ni.

Candidate-te dinhmun

Constituency 94-ah hian inthlan hmachhawn tur candidate 1,352 awmin, candidate zingah hian Gandhinagar-a ding tur Amit Shah, union minister ni lai, Pralhad Joshi leh Jyotiraditya Scindia, Madhya Pradesh chief minister hlui, Shivraj Singh Chouhan leh Nationalist Congress Party (NCP) MP, Supriya Sule te chu a langsar zualte an ni.

Thubuai nei lai candidate 244 an awm a, an thubuaia thiamloh chang candidate pasarih an awm bawk. Crorepati (Vaibelchhe chuang sum nei) candidate 392 an awm a, South Goa constituency-a ding tur BJP candidate, Pallavi Shrinivas Dempo chuan Rs. vbc. 1361 neiin a hausa ber a, Independent candidate, Manohar Pradip Satpute chuan Rs. 2,000 neiin a rethei ber a ni. Candidate zingah neih engmah nei loa tarlan panga an awm bawk. Inthlan thawh thumnaa seat chuh tur zingah hian hmeichhe candidate 123 an tel.

Party-te dinhmun

Lok Sabha inthlan thawh thumnaah hian state leh UT 12 aṭanga constituency 94-ah vote thlak tura ruahman a ni a, seat chuh tur zingah hian independent-a chuh tur leh party tenau deuhte chhiar tel loin, party lian zual deuh 56 an awm. Independent candidate tam berin mi 650 an awm a, BJP chuan dawtin, candidate 82 an nei dawn a, BSP-in candidate 79 neia candidate ngah pathumna an nih laiin Congress chuan palinaah candidate 68 an nei ve dawn bawk a ni.