Rualbanlote tan rel zawng zawngah quota siam a ni dawn

Sorkar laipui hnuaia Ministry of Railways chuan India rama rel zawng zawngah pianphunga rualbanlote tan quota siam a nih tur thu puangin, hei hian rel ṭhenkhat, rel chûan man tihtlawm dan phung nei lote pawh a huam vek dawn a ni.

Rualbanlote tana chûan man tlawm zawk leh an reservation siam hian rel chak chi leh lehkhathawn phur chi; Rajdhani, Shatabdi, Duronto, Humsafar, Gatimaan, leh Vande Bharat te pawh a huam vek dawn a ni.

Ministry of Railway-in ruahmanna a siamah chuan compartment pariat nei relah chuan coach C1 leh C7-ah rualbanlote tan bik seat pakhat (seat no. 40) dah hran tur a ni a, compartment 16 neiah chuan coach C1 leh C14-ah siam a ni thung ang. Vande Bharat express relah erawh chuan rualbanlo chuang chhungte emaw, a enkawltute tan seat pakhat dah hran tel bawk tur a ni.

Rualbanlote tana seat hauh hi dik taka kalpui a nih theih nan online-a ticket book-naah railway-in rualbanlo a ni tih a hriatpuina, identity card neite tan chauh a book theih dawn a, rel station-a ticket book-te tan erawh a hmunah an ID card finfiahna tur a hrana siam a ni leh dawn a ni. Railway hnuaia Centre for Railway Information Systems te chu ruahmanna thar an siam mila reservation siamna software hman lai thlak tura hriattir an ni tawh bawk.