Covishield side-effect chungchanga petition lut Supreme Court-in a ngaihtuah dawn

Britain-a AstraZeneca leh Oxford University-te hmuhchhuah, India rama Serum Institute of India (SII)-in an siam, Covid-19 vaccine pakhat; Covishield-in side effect a neih thu tun hnaia sawi chhuah chungchangah petition theh luh a ni a, Supreme Court chuan petition hi ngaihtuah tura a pawm thu a puang.

Chief Justice of India (CJI), DY Chandrachud chuan petition ngaihtuah hun tur hi a tarlang lo a, mahse, petition-ah hian mi thiam bikte'n Covishield side effect zir chianna neih phûtna leh sorkarin Covishield lak avanga nunna chan chhungte hnena zângnadawmna pek phûtnate tarlan a ni.

Petition theh luttute hian Covishield side-effect zir chianna mai bakah vaccine-in nghawng a la neih theih dangte zir zau an phût thu an tarlang a, zir chianna hi Supreme Court judge bang tawhin an vil an phût thu an sawi tel bawk.

Covishield siamtu, AstraZeneca hian thla hmasa khan an vaccine siamin side-effect a neih zingah thrombosis with thrombocytopenia syndrome a thlen theih thu hi an sawi a, hei vang hian United Kingdom (UK)-ah pawh a side-effect avanga taksa harsatna nei nia inchhal Jamie Scott chuan company hi a khing mek a ni.