Karnataka leh UP CM-ten sorkar laipui-ah ṭanpuina dil

Khawkeng tuar mek, Karnataka leh Uttar Pradesh chief minister-te chuan Prime Minister Narendra Modi-a hnenah ṭanpuina sum an dil.

Karnataka Chief Minister Siddaramaiah hi kar kalta Inrinni khan PM Modi nen New Delhi-ah an state chhunga khawkhengin harsatna a thlen dante an sawidun a, hetah hian CM chuan khawkheng tuar mekte hnena tui in tur leh an ranvulte chaw semna turin cheng vaibelchhe 12,272 pe turin a ngen. Hei bakah hian sorkar laipuiin thlai thar a chhiat dawn avanga chhawmdawlna tura pek alo remtih tawh, cheng vaibelchhe 723 pawh a rang thei anga pe chhuak turin a ngen bawk.

Siddaramaiah chuan PM chuan an state-in harsatna an tawh dan a hrilh chu dawhthei taka a ngaihthlak sak thu leh, a theih anga
ṭanpui a tiam thu a sawi. Karnataka CM hian khawkheng vang hian state chhung district 30 zinga 27-ah thlai cheng vaibelchhe 15,635 hu a chhia niin a sawi. Hei bakah hian lui tam tak a kam avangin tui in tur lamah harsatna an tawk mek tih a sawi a, January thla
aṭang khan thingtlang khaw 1,100 chuangah tanker 1,598 hmangin tui an sem ṭhin a sawi a, khaw 2,071 dang pawh tui pek an ngai dawn tih PM hi a hrilh nghal a ni.

Uttar Pradesh Chief Minister Akhilesh Yadav pawhin PM hnenah hian an state chhunga khawkheng tuar mek, Bundelkhand biala tui semna tur tanker 10,000 lei nan cheng vaibelchhe 11,000 pe turin a ngen. UP sorkar hian sorkar laipuiin Bundelkhand bial tana rel hmanga tui pek a tumna chu a lo hnar tawh a, a suma pe zawk turin a duh a ni.

PM nena darkar khat zet meeting an neih hnua chanchin thar lakhawmtute a kawmnaah, Yadav chuan khawkheng avanga harsatna nasa tak tuar mek, loneitute ṭanpui turin sorkar laipui leh state sorkar chu an thawhdun a ngai tih a sawi a, thingtlang khaw hrang hranga tui semna tur tanker tam zawk neih an duh thu a sawi. PM hnenah hian khaw kheng tuarte harsatna sukiang tura state sorkar hma lak dan hrang hrangte a hrilh nghal bawk.