Nitin road accident vangin mi 400 chuang thi

Sorkar laipuiin data a tihchhuah tharah, kum 2015 khan India ramah road accident vangin nitin mi 400 chuang an thi.

Ministry of Road Transport and Highways-in Rajya Sabha-a data a thehluh tharah, kum 2015 khan rampumah road accident vanga thi mi 1,46,133 an awm a, kum 2014 aiin thi zat hi 4.6% in an pung a ni.

Kum sawm kalta chhung khan motor chetsualna thleng vanga thi hi mi maktaduai 1.3 chuang an awm. Hetihlai hian Standing Committee on Transport, Tourism and Culture-in 234th report a pharhah, Motor Vehicles Act hman mek thlakna tura Road Transport and Safety Bill, 2015 siam rawtna chu kawng hrang hranga dan a ni, a ti. Report chuan ministry-in mipuite himna leh chetsualna thleng venna turin Centre level leh state level-ah transport and public transport bakah driving licence pek chhuah thlenga thununna dan siam a duh a, mahse centre leh state-te chu sum chungchanga an inrem theih loh avangin hei hi hman theih a ni lo a ni, a ti. Hetihlai hian sorkar laipui chuan motor chetsualna thleng
ṭhin tihziawm a nih theih nan zu rui chunga motor khalhte leh, kum tling loa leh phalna nei loa motor khalhte hremna na zawk pek dan turte a ngaihtuah tih a sawi.

Kum 2015 chhunga motor chetsualna thlen tamna chu Tamil Nadu, Maharashtra, Madhya Pradesh, Karnataka leh Kerala state an ni. Heng state-a chetsualna thleng hi rampuma chetsualna thleng aṭanga 29.66% an tling pha a ni. Heng state-ah hian kum 2015 chhung khan motor chesual avanga hliam tuar mi 2,75,873 an awm bawk.