Vawiin-ah Uttarakhand sorkar fiah dawn Congress MLA helte Supreme Court-ah zualko

Sorkar laipui chuan Uttarakhand state-a President's Rule a puan hnuah, Assembly-ah Congress sorkar fiah a remti leh a, vawiin hian fiah a ni ang.

Congress MLA hel pakua-te chu House Speaker-in a disqualify a, hei vang hian sorkar fiahnaah hian vote an thlak ve thei dawn lo a ni. Nimin khan Uttarakhand High Court-ah MLA pakua-te hi vote thlak khapsak an nih chungchangah petition an thehluh a, mahse court chuan an ngenna hi a hnawlsak. Hemi hnu hian MLA-te hi Supreme Court-ah an zualko leh a ni.

Chief Minister hlui Harish Rawat-a chuan HC thutlukna siam chu lawmawm an tih thu a sawi a, sorkar fiah a nih hunah rorelna dik tak chu a lang≠chhuak dawn a ni, a ti. Kum 4 chhung harsatna leh dinhmun khirh tak an tawh lai pawha anmahni thlang tlinga thlawptu, mipuite chuan an thlawp chhunzawm zel dawn niin a sawi.

Congress MLA helte hi vote laknaah a tel phalsak a nih loh chuan Assembly House-a member 70 awmna aṭangin member 61 aṭangin vote lak a ni ang a, majority nei pha tur chuan MLA 31 thlawpna an neih a ngai dawn a ni.

Pathianni khan CM hlui Rawat hi MLA helte hi thamna pek a tum lai video nia sawi chu tihchhuah a ni a, hemi hma hian an party MLA helte hi sum hmanga thlem let a tum nia sawina video pawh tihchhuah a lo ni tawh a, hei hi CBI chuan a chhui chiang mek a ni. Mahse Rawat chuan heng video pa≠hnihte hi siamchawp an nih thu sawiin, BJP chu amah blackmail tumah a puh. "Centre leh BJP sorkar hian mi ṭhendarh zawngin politics an khel a, May 10-a sorkar fiah a nih hunah, hetianga mi blackmail chingte dodalna campaign hi kan ṭan dawn a ni" a ti.

March 27-a sorkar laipuiin Uttarakhand-a President's Rule a puan hma khan Harish Rawat-a kaihhruai Congress sorkar a ding a ni. Mahse Congress MLA hel pakua-ten March 18-a CM-in annual budget a pharh khan a dodal zawngin an vote nia sawiin, danpui a humhalh zo lo nia puhin President's Rule hi a puan hnan ta a ni.