Thubuai tangkhang chingfel turin judge 70,000

Chief Justice of India TS Thakur chuan ramchhunga thubuai tangkhang tam tak awm mek chingfel tur chuan judge 70,000 chuang mamawh a ni, a ti.

Ramchhung mipui awm zat aṭanga tehin judge awm zat chu an tlem hle tih sawiin, hei vang hian court rorelna pawh a chak thei lo a ni. Court thubuai tangkhang awm mek hi vaibelchhe 3.14 a tling tawh a, hemi chungchang hi tunhnaia CJI hian Prime Minister Narendra Modi nena press conference an neihnaah a lo sawichhuak tawh a ni.

CJI chuan, "Mipui pun chhoh dan aṭanga chhut chuan thubuai tangkhang mek tifel tur hian judge hi 70,000 chuan kan mamawh dawn a ni" a ti a, hetihlai hian High Court judge 170 lakna tura rawtna thehluh chu sorkar chuan a la tikhawtlai mek a ni, a ti.

Judge indaih tawk lohna chu judiciary lamin harsatna a tawh lian ber a ni tin sawiin, Justice Thakur chuan High Court hrang hranga judge post sanction 900 zingah post 450 te chu rang taka hnawhkhah an ngai tawh tih a sawi bawk.

CJI chuan kum 1987 khan Law Commission of India chuan thubuai tikhawtlai mekte chingfel turin judge 44,000 mamawh a nih thu a lo tarlang tawh tih sawiin, tunah hian ram pumah judge 18,000 chauh an awm a ni, a ti. Kum sawmthum hnuah pawh indaih lo taka an thawh reng thu a sawi.