Minute 15 tling loah China kan paih chhuak thei : Rahul Gandhi

Congress hruaitu Rahul Gandhi chuan prime minister Narendar Modi chu ramria India leh China buaina chungchangah sawiselin, Congress chuan sorkarna siam se minute 15 pawh tling loah China chu India aṭanga an paih chhuah theih tur thu a sawi.

Thawhlehnia farm law duhlohna rally, 'Kheti Bachao Yatra' neihah he thu hi Rahul Gandhi chuan a sawi a ni.PM Modi chu mi dawihzep tak nia sawiin,  "PM dawizep tak chuan kan ram hi tuman min laksak lo tiina sawi a ni. Mahse vawiin ni hian khawvelah ram dangin mi ram an laksak theih chu pakhat chiah a awm,  chu chu India a ni. India ram square km 1,200 chu ram dangin a laksak a ni. Hetih lai hain PM chuan 'deshbhakt' (ram hmangaihtu) tiin a inko a, mahse China sipaite kan rama an rawn luh ṭan chu mitinin kan hre thung a, eng ang ram hmangaihtu nge a nih? Kan party in sorkarna chang ila chuan minute 15 pawh tling loah China mi lo lutte hi kan chhuah tir thei ang," a ti. 

Rahul chuan "Ka tiam a che u sorkarna kan siam a nih chuan China hian kan ram chhungah pen khat pawh an ram an rawn zauh belh lo ang," tiin a sawi a ni. 

Congress hruaitu chuan Prime Minister chu aircraft pahnih, cheng vaibel­chhe 8,000 man lei chungchangah na takin a sawisel bawk. "Kan ramriah China sipaite inkulhin, kan security force-ten khawvawt tak hnuaiah min venhim nan hrehawm tak an tuar a, hetih lai hian prime minister Modi chuan sum tam tak sengin thlawhtheihna pahnih a lo lei thung a ni," a ti.