ED-in Cox and Kings Group CFO Anil Khandelwal an man
Enforcement Directorate (ED) chuan Thawhlehni khan global tours and travel company Cox and Kings Group (CKG) chief financial officer (CFO), Anil Khandelwal chu Yes Bank pawisa tihchingpen chungchang kaihhnawihah an man.
Anil Khandelwal bakah hian CKG ex-internal auditor Naresh Jain chu man a ni bawk. Prevention of Money Laundering Act, 2002 (PMLA) hnuaia section 19 hmanga man an ni. An man phahnih te hi Special Judge (PMLA) hmaah an inlan dawn a, hemi hnu hian ED custody-ah ni sarih chhung an awm leh ang.
ED tarlan danin Yes Bank hian CKG hnenah loan cheng vaibelchhe 3,642 an pechhuak a, mahse heng pawisa te hi an rul ṭha lo a ni. CKG hian balance sheet leh board resolution lem hmangin Yes Bank aṭang hian loan an la chhuak nia sawi a ni bawk.
Yes Bank hian Syndicated loan leh Corporate banking hmangin sum a hailut ṭhin a, ADB, OPIC, European investment bank, Taiwan leh Japan bank aṭang tein sum a puk a, heng sum a pukte hi India ramchhunga sumdawng (small and medium enterprise) leh corporate liante hnenah a puk chhawn tir leh ṭhin a ni.
Heng pawisa Yes Bank-in a puk tirte hian an rul ṭha lo hle a, hei vang hian bank chuan Non Performing Assets (NPA) a ngah chhoh phah ta a ni. NPA hi ni 90 piah lama loan rul ṭha lote tih an ni bawk.
Loan rulh loh chhekkhawl tam vang hian bank hian pawisa che vel a ngah tawk lo a, pawisa kawl (stock) a neih tlem tak avangin RBI chuan kumin kumtir lam khan bank chungah thununna a lek phah tawh a ni.
Hemi chungchangah hian kumin March 8 khan kum 2004-a Yes Bank dintu Rana Kapoor chu Enforcement Directorate (ED)-ten Prevention of Money Laundering Act hnuaiah an lo man tawh bawk.