Lok Sabha inthlan thawh thumna tluang takin zo

India ram roreltu tur thlanna, Lok Sabha 2024 inthlanpui chu nimin khan state leh Union Territory 11 aṭanga constituency 93-ah vote thlak chhunzawm leh a ni. Hriat theih chinah nimin tlai dar 3 thleng khan vote tla hi 50% a tling tawh.

Inthlan thawh thumna atan hian polling booth 1,89,757 siam a ni a, state leh UT inthlang zawng zawng-ah hian voter vaibelchhe 11 chuang an awm a ni.

Inthlan thawh thumnaah hian constituency 94-ah vote thlak turin ruahman a ni a, mahse, Gujarat-a Surat constituency-ah BJP candidate chuan chuhpuitu a neih loh avangin tlinga puan niin, vote thlak a ni lo. Jammu & Kashmir-a Anantnag-Rajouri constituency chu helpawl beihna a thlen avangin fimkhur thilah inthlan thawh rukna ruala neih tura sawn a ni bawk. Hetih lai hian inthlan thawh hnihnaa neih tura ruahman, Madhya Pradesh-a Betul constituency-ah chuan nimin khan vote thlak a ni ve thung.

Gujarat: Gujarat-ah hian Lok Sabha seat 26 awmin, seat 25-ah inthlan a ni a, candidate 265 an awm a ni. Polling booth 50,788 siam niin, voter vaibelchhe 4.97 an awm.

Maharashtra: Lok Sabha seat 48 awmna, Maharashtra-ah hian inthlan thawh thumnaah constituency 11-ah inthlan niin, polling station 23,036 siam a ni a, candidate 258 awmin, voter vaibelchhe 2.09 an awm a ni.

Uttar Pradesh: India rama Lok Sabha seat tamna ber leh thawh sarihna thlenga inthlang tur, Uttar Pradesh-ah hian Lok Sabha seat 80 awmin nimin khan seat 10-ah inthlanna neih a ni. UP-ah hian Dhoranpur khua chuan inthlan an boycott a, hei hi kawng ṭha an ngiat pek an nih loh vang a ni. An harsatna chungchanga hruaitute an koh eih theih beiseiin Firozabad - Nagla Jawahar, Neem Kheria leh Nagla Umar khuate chuan vote an thlak duh lo bawk.

Madhya Pradesh: Madhya Pradesh-ah Lok Sabha seat 29 a awm a, nimin khan seat pakuaah inthlangin, candidate 127 an awm. Heng constituency pakuaah hian voter vaibelchhe 1.77 an awm a ni.

Karnataka: Karnataka-ah hian Lok Sabha seat 28 awmin, inthlan thawh hnihnaah khan seat 14-ah vote thlak tawh a ni. Nimin khan seat 14 atan inthlanna neih leh a ni a, candidate 227 awmin, voter vaibelchhe hnih chuang an awm bawk. Koppal district-a Vittalapur khua chuan tun hnaia Tavaragera community health centre-a hmeichhe rai puar thih chungchanga an lungawi lohna lantir nan inthlan an boycott. Rai puar thihna hi doctor inthlahdah vang niin an sawi.

Chhattisgarh: Chhattisgarh-ah hian Lok Sabha seat 11 awmin, nimin khan seat pasarihah inthlan a ni. Candidate 168 awmin, voter vaibelchhe khat chuang an awm bawk. Candidate 168 zingah hian hmeichhe candidate 26 an awm a ni.

Bihar: Bihar hi inthlan thawh khatna aṭanga thawh sarihna thlenga inthlang tur state an ni a, nimina inthlan thawh thumnaah hian Lok Sabha seat pangaah inthlanna neih a ni. Voter nuai 98 chuang awmin, candidate 54 an awm.

West Bengal: Lok Sabha seat 42 nei West Bengal-ah hian inthlan thawh thumnaah Lok Sabha seat paliah inthlanna neih a ni a,voter nuai 73 chuang an awm. Nimina inthlang state zingah West Bengal hi vote tlak ṭhatna ber ni mah se, inthlan kaihhnawih buaina tenau chhuak a awm nual a ni.

Goa: Goa-ah hian Lok Sabha seat pahnih; North Goa leh South Goa parliamentary constituency-te a awm a, inthlan thawh thumnaah hian vote thlak zawh vek a ni. Polling station 1,725 siam a ni a, voter nuai 11 chuang an awm a ni.

UT: Union Territory zinga Jammu & Kashmir-ah inthlan hun sawn hlat a nih tak avangin nimin khan Dadra Nagar Haveli and Daman & Diu UT-ah chauh inthlan buatsaih a ni a, Lok Sabha seat pakhat atan inthlanna neih a ni.