Congress-in MGNREGA hlawh tipung dawn

Ratlam Lok Sabha constituency, Madhya Pradesh-a Alirajpur-a Congress hruaitu Rahul Gandhi-a'n election rally neihnaa thu a sawiah, Congress chu rorel tura thlan tlin an nih chuan Mahatma Gandhi National Rural Employment Guarantee Act (MGNREGA) hlawh an tihpun tur thu a sawi.

Rahul Gandhi chuan,"MGNREGA avang hian press mite chuan mipuite nunphung chhe ta vek angin an sawi a, hah taka in thawh hlawh in hmuh chu in nungchang tichhetuah an chhuah a ni. Hetih lai hian billionaire-te loan ngaihdam a nih chuan hmasawnna an ti thung si. Hei vang hian Congress chuan tun inthlanah hian kan tling a nih chuan, MGNREGA hlawh, ni khata Rs. 250 ni ṭhin hi Rs. 400-ah tipung turin thu kan titlu ta a ni," tiin a sawi. Rahul Gandhi hian hemi ni vek hian Khargone Lok Sabha constituency hnuaia Segaon khuaah election rally a nei chhunzawm bawk a ni.

Rally neihna hmun hnihahte hian Rahul Gandhi hian BJP bei bawkin, Lok Sabha seat 400 la tura an beihna chu thil thleng lo tur a nih thu leh, seat 150 aia tam an lak loh tur thu a sawi. Gandhi hian BJP chu India constitution thlak tuma beiah puh bawkin, court-in reservation siam theih chin, 50% a tih chu paih a, tribal leh hnam hnuaihnung zawkte'n an mamawh chu an ngaih pawimawh hmasak tur thu a sawi tel bawk a ni.