NC hotute'n Kashmir chungchangah Pakistan nena inremna neih duh

Jammu & Kashmir-a National Conference (NC) party president, Dr. Farooq Abdullah leh vice-president, Omar Abdullah te chuan Kashmir chungchangah Pakistan nena inremna neih an duh thu an puang.

South Kashmir-a Pulwama-a election rally neihnaah Dr. Farooq Abdullah chuan,"India hian tu pawh a bia a, China nen ngei pawh inbiakna a nei mek a ni. Hetih lai hian J&K hmun ṭhenkhat Pakistan-ah a awm ti reng siin Pakistan erawh a be lo. Prime Minister Narendra Modi ngei pawhin indo chu buaina chinfel dan kawng a ni lo tih sawiin, heti a nih chuan Pakistan nena inbiakna neih hi tihtheih awm chhun a ni," a ti. North Kashmir lama rally neihna dangah Farooq Abdullah fapa, Omar Abdullah pawhin a pa thusawi zulzui hian Pakistan nena inbiakna neih a duh thu hi a sawi ve bawk.

Dr. Farooq Abdullah hian India leh Pakistan chu inbiakna awm thei tura boruak siam tura a duh thu a sawi lang a, ṭhian chu thlak theih ni mah se, ṭhenawmte erawh thlak theih a ni lo tiin, Pakistan-a sorkar thar leh, India-a sorkar thar piang tur chuan ram pahnih inkara inbiakna mumal tak nei tura a duh thu a sawi a ni.