Bengal-a zirtirtu 23,000 chuang banna tur Supreme Court-in stay

Calcutta High Court-in lak an nih dana thil dik lo a awm nia a hriat, West Bengal-a zirtirtu 23,000 chuang banna tur thupek a chhuah tawh chu Supreme Court chuan a stay lailawk.

Judge pathum awmna, Chief Justice of India D.Y. Chandrachud ṭhut bench chuan Thawhlehni khan West Bengal sorkarin petition a theh luh ngaihtuahin, Calcutta High Court thuchhuah, West Bengal sikul hrang hranga thawk teaching leh non-teaching staff 23,123-te ban tura a tih chu West Bengal sorkar hian an khing a ni. Supreme Court hian high court thuchhuak hi stay rih mah se, zirtirtu lak dan dik lo nia sawi chungchanga CBI-in an chhui chian mek chu chhui chhunzawm turin a ti thung a, West Bengal sorkarin high court thuchhuah a khin letna pawh hi July 16-a ngaihtuah turin a dah.

Kum 2016 khan West Bengal School Service Commission (WBSSC) chuan zirtirtu lakna tur hi buatsaihin, class 9 -12 zirtirtu bakah, non-teaching staff eng emaw zat a la tel a ni. Calcutta High Court chuan April 22 khan heng sikula thawktu mi 23,123-te lak danah hian pawisaa inthamna a awm nia sawiin, an vai hian ban turin thu a titlu a ni.

Supreme Court thuchhuah avang hian West Bengal-a rorel lai, Trinamool Congress (TMC) chuan an lawm thu sawiin, court sang berin thutlukna dik tak a siam chu an tan pawh a hahdamthlak thu an sawi. TMC hruaitu, chief minister Mamata Banerjee chuan mi 23,000 chuangin vawi leh khata hna an chan mai tur chu eptute rilru verther lutuk vang a nih thu a tarlang tel bawk.